ما بفهم بالسياسة مش حابب أوجع راسى، و بالرغم من عدم فهمى الكامل للسياسة و الحياة بشكل عام، لكن من وجهة نظرى المتواضعة شايفة شبه تطابق بين اللى حصل فى الحياة السياسية فى مصر و اللى بيحصل جوا كل بنت أو ولد .

الثورة لما حصلت مبقاش مهم الاستقرار فعلاً أهم حاجه ناخد حريتنا و حقوقنا و بعدين الاستقرار ييجى و مش غلط ده أكيد الحقوق أهم، بس لما الحقوق مجتش و الثورة محققتش حاجة و فى ناس بتوصل لنقطة "ياريت اللى جرا ما كان "ده مبقاش ينفع تمثل انك مالكش حقوق و تحمد ربنا على الولا حاجه و فى نفس الوقت مش عارف تاخد حقوقك .

فاحنا بقينا زى اللى بيرقصوا على السلالم و أنا مش جاية أتكلم عن السياسة لأنى زى ما قولت انا مابفهمش فيها، بس هو ده نفس اللى حصل فى العلاقات احنا كبرنا و أهالينا كل كلامهم إن أهم حاجه "السترة"، و الحب مش كل حاجة و !!ده راجل و ميعيبوش إلا جيبه .

و احنا برضه معجبناش كلامهم و بدأنا ندور على حقوقنا و عرفناها ،بس خلينى أوضح هنا فى ناس حزب الكنبة فبقينا فى نفس المجتمع و نفس السن و بنتكلم لغة مختلفة مش مفهومة لمجموعة مش قليلة ،أصبحنا منحصرين فى نفس النقطة لا عارفين نوصل لحقوقنا كاملة فى كل المواقف و لا عارفين نستهبل و نقول زى أهالينا عشان احنا خلاص فهمنا فوصلنا لنقطة مش مبسوطين بالوضع الحالي ،و لا عارفين نحقق الانبساط بالطريقة اللى شايفنها فبقينا جيل كئيب و !!محبط و ادينا مكملين لحد ما نوصل لنتيجة واحدة "هنياله اللى لقى واحدة تحبه و يحبها" رغم الوضع الاقليمى .