أحمد بكر يكتب : 4 بنات !

انا ماكنتش اعرف ان انهارده يوم المرأة العالمي، فيسبوك قاللي احتفل عشان انهارده –ربنا يكرمه، اول حاجه جت في دماغي وقتها تجسيدا لمعاني جمال المرأة اللي لازم نحتفي بيه 4 بنات صديقاتي، كنت محظوظ كفاية اني اتعرف عليهم ويبقوا صديقاتي من فترات، الجميل والبديع ان الاربعة مختلفين تماما يمكن في كل حاجة ورغم ده بتجمع ما بينهم –وبين كل الجميلات- الجمال الانثوي الصافي البديع، وده شئ منطقي جدا بالنسبالي ان اكيد ولازم وحتما ولابد اننا نحتفي بالجمال ده

صديقاتي هما

 شروق 

انا بحب شروق جدا الحقيقة، ويمكن مع الوقت كان حبي ليها بيزيد ووصل لدرجة انا مابقتش بعرف اشرحه او يخليني اعرف اكتب عنه او عنها، بس شروق هي معنى صافي من معاني الجمال الموجودة في حاجات كتيرة حوالينا، الحاجات اللي معناها الجميل مجرد ومابيتأثرش بالوقت وبأفعال البشر 

 مهجه 

مهجه ضديقتي من فترة قليلة يمكن مكملناش سنتين مثلا، مهجه من اصدقائي الاكثر محبة في قلبي، مهجه عبقرية بشكل رائع ومختلفي في حاجات كتير جدا فشخ يعني، من تفاصيل صغيرة لتفاصيل كبيرة، مهجه بتمثل معنى ان الست تكون جميلة جدا وفي نفس الوقت تكون على قدر كبير من العقل والرزانة والمنطقية لا يمنعها ابدا من انها تلبس في الحيط كذا مرة وتزداد حلاوة وطفولة مع الوقت 

حسناء 

صديقتي العزيزة جدا، حسناء بيتمثل فيها معنى ان الست الجميلة لازم وحتما ولا بد تبقى ضعيفة وقوية في نفس الوقت وازاي دي ماعرفش الحقيقه، حسناء حتى لو قعدنا ساكتين طول الوقت اللي بنتقابل فيه هابقى مستمتع جدا برضه وببقى منبهر لما بتبدأ تتكلم او تحكي، البنت اللي تفتن بجمال دماغها وثقلها وخفة روحها في نفس الوقت

 منى 

منى الاسكندرانية الجميلة، انا ما بحسش احساس اني قاعد قدام حد اكبر مني وانا قاعد مع حد اكبر مني كتير برغم اني ببقى معترف بكدا تماما واني لسه عيل صغير، منى اول ما عز الله يكرمه عرفني عليها كل مرة بروح اسكندريه فيها واقابلها ببقى حاسس الاحساس ده ومنبهر بيه وكلي شكر اني بحسه، على جانب تاني منة بيتجسد فيها معنى الانثى الجميلة الخفيفة الجدعة واللي لفت و شافت وعرفت كتير، البنت اللي على وضعها الذكية، منى بتجبرك دايما انك تفتكرها على طول من اول مرة وما تنسهاش حتى لو كنت شخص بينسى بشكل مبالغ فيه زي كده

الحاجة البديعة بالنسبالي في النهاية ان كل واحده منهم جميلة بشكل استثنائي ومختلف عن غيره، وده بيثبت ان الخالق ابدع في خلق الستات وان اللي قال اننا نحتفي باليوم ده على وضعه! 

عندي اعتقاد دايما بأن البنات جميلة عشان هما بنات اصلا قبل اي حاجه بس بحس دايما بأن حبه منهم بس هما اللي جميلات جمال استثنائي –ويمكن الحبه دول بيزيدوا كل شوية-، وبعتقد برضه ان الجمال الاستثنائي ده مش بيحتاج مكياج او لبس حلو او لغة او وضع اجتماعي عشان يبان، هو بيبان كده لوحده اول ما تشوفه ، و من نعم ربنا علينا الحقيقة  انه يخلص معاني الجمال الاستثنائي ده معانا هنا في الدن   

في النهاية انا بشكر  الجماعة المذكورين اعلاه على انهم موجودين في حياتي وانا شاكر جدا للصدف والاشخاص اللي عرفوتني بيه بشكل مباشر او غير مباشر