يوتوبيا العلاقات

"أنا ضحيت بعمري كله عشانك و بطلب منك بس إنك تغيري طريقة لبسك, شغلك, أو حتي متروحيش المكان ده" "يعني أنا عملت كل اللي يسعدك و انتي مش راضية بس تقطعي مع صاحبك ده عشاني, علي فكرة لو العكس كنت ضحيت" "أنا أمك, أبوكي, جوزك, خطيبك, حبيبك, صاحبتك; يعني أكيد عايزك أحسن حد في الدنيا" "أنا مش عايز غير مصلحتك" "أنا عايز ربنا يرضى عنك و عايزك تدخلي الجنة" "أنا عشان غلطت مش عايزك تغلطي" "أنا ندمانة علي اللي أنا عملته فمش عايزاكي تندمي زيي" أكيد في جملة واحدة علي الاقل من الكلام اللي فوق ده اتقالتلك قبل كده, و علي فكرة مش معني إن الكلام مكرر إن اللي بيقولوه كدابين أو بيزيفوا مشاعرهم, بالعكس تماما هو ده فعلا اللي هم حاسينه هم فعلا خايفين علينا .. بس مين قالهم إن إحنا مش عايزين نندم و نغلط و نكتشف إننا كنا غلطانين و نتعلم ؟! مين قالهم إننا مستنينهم يدونا الخريطة اللي هنظبط بيها اتجاهاتنا في الدنيا ؟! مشكلة الناس اللي بتقول الكلام ده إنهم فعلا بيحبونا فبيكتمونا, عايزنا ملايكة مابنغلطش,حتي لو هما غلطوا بس هما عيينونا نبهرهم و نرضيهم بمرتب ثابت -حبهم اللي مبيخلصش- , بس طلع إنك تكون محبوب من حد ده ضريبته صعبة قوي; لأن للأسف احنا مش ملايكة, الملايكة مابيغلطوش عشان ربنا خلقهم كده يعبدوه و بس, ما إداهمش حرية الإخيتار أصلا, لكن احنا ربنا خلقنا بشر بنعبده و نرضيه و نحبه بس لو احنا عايزين كده, احنا مش مجبرين علي حاجة.

الناس اللي شايفانا ملايكة وماينفعش نغلط دول بيخالفوا قواعد الدنيا اللي ربنا خلقنا عليها, ربنا لو كان عايزنا مانغلطش كان اكتفي بالملايكة, بس هو ادالنا حرية الإختيار و احترمها رغم حبه لينا .. انتوا مش هتحترموها ؟!

المشكلة ديه بتواجهنا من أهلنا و صحابنا و حبايبنا, و احنا –الطرف المطالب بالتضحية- فعلا بنبقي طول الوقت حتي و احنا بنعمل اللي احنا عايزينه دايما مصاحبنا إحساس بالذنب, و إننا مخيبين ظن اللي قدامنا و كسرينهم, أي نعم الإحساس ده ممكن مايمنعناش بس بيبوظ فرحتنا, فلأ احنا المفروض مانحسش كده لأننا مش مطالبين ابدا نكون أبطال لحد. الأهالي هم اللي لازم يفهموا إن التضحية بالعمر –رغم صعوبتها- هي مش أصعب حاجة في الخلفة; إنما أصعب حاجة في الخلفة فعلا إنك مضطر تتقبل إبنك ايا كان هو إيه و تفهم إنه مش دايما هيبهرك, بالعكس هو ممكن يكون أكبر إحباط في حياتك, ممكن يكون عكسك تماما, و عشان كده الخلفة صعبة, فلازم تشوف إنت قد التحدي و لا لأ ؟! قد إنك تقابل عيالك و تتقبلهم ولا لأ ؟! علي فكرة الكلام ده مش حصري في العلاقة بين الأهالي و الأبناء, الإبتزاز العاطفي موجود في كل أشكال العلاقات و مؤذي لكل الأطراف اللي في العلاقة, فمن الآخر يا تكون قد الخلفة أو قد إنك تقابل شخص مختلف, يا  تتجنب الموضوع تماما لأن الإبتزاز العاطفي مش أكيد هيوصلك للي إنت عاوزه بس الأكيد إنه هيئذي اللي قدامك.