ندى عبد الغنى تكتب : الجاكيت مش مقاسي

نزلت اجيب لبس وكل ما اقيس حاجة متبقاش حلوة تبقي مقاسي بالظبط بس مش حلوة عليا خالص، لحد ما لقيت جاكيت عجبني بس معجبش صاحبتي اللى كانت معايا روحت البيت اخد ثقة شوية من ماما فى الجاكيت معجبهاش برضوا وقالتلي رجعيه، بس انا مرضتش،
دخلت الاوضة اقيسه لقيته عجبني قوى حسيت فيه حاجة مني! لبسته وخرجت وكنت حاسة براحة فيه ومبسوطة اوي رغم اني شخصية مترددة وممكن اغير رأيي بس انا متاثرتش خالص برايهم فيه المهم انه عجبني وبحافظ عليه،
 من فترة كان فيه شخص معجب بيا واصحابي بيقنعوني بيه اللي هو علي مقاسي! بس لا انا مكنتش حساه ومرضتش اديله فرصة حتي، ممكن يكون الظروف وكل حاجة مناسبة نفس المقاس زى اللبس اللى كنت بقيسه ومش حساه نفس مقاسي بس مش عاجبني عليا، لا.

اتعلمت حاجة ان الحب بييجي زى اخر جاكيت عاجبني ممكن يكون الناس شايفاه عادى او اقل من العادى كمان بس انتي شايفاه احلي جاكيت ممكن تجبيه، حاسة براحة وانتى لابساه مش مهم الناس شايفة اية، المهم انك لما تحبي ملكيش دعوة برأي حد متجبيش اى جاكيت لمجرد انك لسة ملقتيش الحاجة اللى تخليكي مهما كنتي مترددة متتاثريش براي حد، وبما انك كدة كدة هتلبسي يبقى البسي الجاكيت اللى تحسي ان فيه حاجة منك.