أكلات و مشروبات بديلة لمسكنات آلام الدورة الشهرية

كل شهر بيبقى فيه كام يوم كده شبه الكابوس لكل بنت فينا، أيام بتبقى عبارة عن تعب واكتئاب وخنقة وقرف، كتير مننا بيلجأ للمسكنات اللي بيروح مفعولها بعد ساعات قليلة جداً و نرجع ناخدها تاني و هكذا لحد ما الأيام دي تخلص و تكتشفي أن المسكنات دي ليها أضرار كبيرة على المدى البعيد.

عشان كده "احكي"  جابتلك شوية مشروبات ومأكولات تخفف عنك آلام الدورة بدون مسكنات.

- المشروبات

طيب قبل ما نقول المشروبات اللي بتسكن ،لازم الأول نبتعد تماماً عن شوية مشروبات زي البيبسي والمشروبات الغازية كلها والقهوة والآيس كريم والعصاير الجاهزة.

وبدل من دول ممكن تشربي قرفة وزنجبيل بليمون وبقدونس مغلي وحلبة  بالعسل وكراوية ونعناع و و ورق التوت لأنهم بيحّتوا على خواص كتيرة بتسكن الألم وبتدفي الجسم.

•  - المأكولات

ممنوع برضو الوجبات السريعة والدسمة والمعلبات زي التونة وغيرها ، واستبدليهم بالألبان اللي هتزود جسمك بالكالسيوم وكمان زودي من كمية اللحوم الحمرا  اللى بتأكليها في اليوم، والخضروات زي البروكلي والملفوف وكمان زودي من الشيكولاتات والمكسرات .

كمان جسمك الفترة دى بيحتاج للحديد أكتر من أى وقت تاني و ده هتلاقيه في اللحوم و البقوليات زي العدس والفول والخضروات زى السبانخ و متنسيش معلقة العسل الأسود.