”الحضن الحضن”.. شوية أسباب ليه نحضن بعض

الحضن عامل زي كوباية النسكافيه أو القهوة اللي بتفوقك الصبح وتخليك ترجعي للدنيا وتبدأي الشغل، بس للأسف الحضن سلوك مش منتشر والناس لسه شايفين الحضن في الأماكن العامة عيب .

على الرغم من أن الدراسات الطبية أثبتت أن الحضن  ليه فوايد كبيرة سواء  كانت معنوية أو جسدية ، بس برضو ثقافتنا العربية بتقول عيب ..

احكي جمعتلكم شوية أسباب عشان نحضن بعض براحتنا ونفك من الناس ومن الثقافة

1- الحضن بيزودنا بدفعة معنوية نقدر بيها نكمل طريقنا وحياتنا ،أحيانا بيعدي علينا وقت وبنحس أننا منبوذين، محدش عاوزنا ، بس حضن واحد ممكن يعالج كل الأفكار السلبية دي ويرجعنا لروحنا ويرجع ثقتنا بنفسنا.

2- في دراسة حديثة أكدت أن الأشخاص اللي مش بيتحضنوا أو بيحضنوا معرضين لأمراض القلب لأن ضربات قلبهم بتزيد بنسبة 10% عن المعتاد .

3- الحضن بيزود إفراز مادة الأوكسيتسون المسببة للسعادة، وبالتالي بيقلل الضغط والتوتر، فنحضن كتير يا جماعة كتير قوي.

4-الحضن بيخلينا ننسى مشاعر الكراهية اللي بتسيطر علينا في أوقات كتير .

5- الحضن بيقلل أمراض ضغط الدم، و في دراسات بتقول أن الأشخاص مجرد ما بيلمسوا بعض بتنشط "جسيمات باتشيني" المسئولة عن إرسال إشارات للعصب اللي برضو مسئول عن تقليل الضغط ، فيعني بدل ما ناخد أدوية ضغط ب 500 ج ، احضنوا بعض ووفروا .