صدفة في 253 Street

من كذا يوم قررنا نلف فالمعادي ونختار مكان عشوائياً لقعدة الصحاب، ودا لإننا زهقنا من تكرار نفس الاماكن اللي بنتقابل فيها، دخلنا من ميدان فيكتوريا علي الشارع اللي بيوصَل لكلية النصر وتحديداً بعد سوبر ماركت سعودي بحوالي 300 متر عنينا شافت المكان اللي شدنا ليه من اول نظرة.

المكان ده في شارع اسمه شارع 253 (شوارع المعادي كلها ارقام) الشارع حقيقي مايتوهش لو انت تعرف فالمعادي هتعرف توصل لميدان كلية النصر وهوا شارع متقرع من الميدان ده ويعتبر كمان قريب جداً من جراند مول المعادي.

اللي شدنا للمكان من اول نظرة كان القعدة الخارجية اللي معمولة على التراز الإيطالي بالترابيزات والكراسي الخشب والشمسيات المفتوحة وسط اشجار المعادي المعروفة بجمالها.

دخلنا المكان واخترنا نقعد جوا عشان الحر رغم ان المكان برا فيه مراوح كبيرة مناسبة للمساحات الخارجية بس احنا قولنا نجرب التاكيف بما اننا بدأنا الصيف.

علي الباب بتلاقي لوحة بتعرفك ان المكان ده فيهWi-Fi  وعلامة قنوات brein Sport  وعلامة لوجود شيشة فالمكان.

اول اما دخلنا استقبلونا العاملين فالمكان بترحاب كبير ودا ادلنا انطباع ان المكان مريح هننبسط فيه. المكان اما تدخله مش كبير، عبارة عن تقريباً 8 ترابيزات، دا غير الترابيزات الكتير اللي فالجزء الخارجي، بس بتحس فيه براحة وهدوء وخصوصاً ان الديكورات فالمكان معمولة بالخشب والحجر ودا بيخليك تحس انك في مكان مختلف، المكان بصفة عامة مناسب للي بيحبو الهدوء ومناسب كمان للمذاكرة وكمان الموسيقى اللي بيشغلوها كلها اغاني هادية اغلبها اغاني السيدة فيروز.

أول أما قعدنا جالنا الويتر ومعاه المنيو اللي هو كان عبارة عن ورق متصور ابيض واسود خالي من الصور بصورة بدائية جداً ومعموله تغليف بغلاف بلاستيك، ودا خلَانا نسأل هوا فاتح من امتى، اللي عرفناه انه فاتح من كام شهر بس لسه ما مجهزش المنيو.

طلبنا بيبسي عشان ماتشجعناش اننا نطلب حاجة من المنيو اللي ماكانتش علي مستوى المكان، بس بعد شوية شوفنا الناس اللي حوالينا كانو مبسوطين بطلباتهم ازاي واللي كان اغلبها كوكتيلات عصاير وبيتزا وقهوة، ودا هيخلينا المرة اللي جاية هنطلب بقلب جامد.

المنيو رغم صغرها الا ان فيها اصناف كتير وتنوع  مابين البيتزا والباستا والسلطات والمشروبات، أما بقى بالنسبة للاسعار فهي مناسبة جداً ومش غالية.

قررنا نجرب الشيشة وطلبنا يقولولنا الانواع الموجودة عندهم ولقينا عندهم كل الانواع تقريباً فأخدنا ميكس فراولة قشطة وميكس كيوي مانجو وحقيقي كانت الشيشة خرافية ومظبوطة وعامل الشيشة كان علي طول متابعنا من غير ما نضطر ننادي عليه رغم ان المكان كان مليان وهو كان واحد بس.

بالنسبة لنظافة المكان فبصراحة المكان نظيف، بما اني موسوسة نظافة من اللي بيشموا الكبايات قبل مايشربوا فيها، وكمان دخلنا الحمام، اللي بالمناسبة صغير شوية، كان نضيف جداً وبصراحة كان عامل النظافة كل شوية ينظف المكان اكتر.

المكان بصفة عامة حلو ويديك احساس بالراحة وحتي زبائنه اللي معظمهم من الاجانب ، كانو ودودين جداً والعاملين فالمكان بيتعاملوا مع كل الناس بطريقة ودودة جداً

طلبنا الحساب والفاتورة جاءت معقولة جداً وطبعاً ما فاتناش نسأل عن امكانية الدفع بالكريديت كارد وكان الرد انهم مع الاسف مابيقبلوش الا الكاش ودا معملش اي مشكلة نظراً لقلة مبلغ الفاتورة مقارنة بالمبالغ اللي ممكن تدفعها في اي كافية تاني فالمعادي.

نصيحة جربوا اماكن جديدة وماتخافوش من التجريب، ساعات كتير التجربة بتوصلكوأ لأماكن تسبب لكم السعادة وتستاهل عناء التجربة زي ماحصل معانا في 253 Street