إزاي تعذبي صاحبتك المتأخرة .. في خطوات

كل شلة بنات فيها مجموعة من الشخصيات إللي لازم تلاقيها متكررة في كل الشلل التانية ومن ضمن الشخصيات دي " الصاحبة إللي دايمًا متأخرة" .

صاحبتك دي مُمكن تسيبكوا في الشارع لساعة وساعتين عادي جدًا لمُجرد إنها " كانت بتاخد شاور" أو ممكن تكون نازلة من بيتها الساعة 5 وإنتوا متفقين تتقابلوا 4 بتحصل برضة أو حتى ممكن متنزلش من بيتها أصلًا وتسيبكوا في الشارع لإنها ببساطة نسيت إنها نازلة معاكوا ، في الواقع تعددت المُبررات والأسباب ومرضها إللي ملوش علاج قرب يجيبلكوا إنتوا المرض ! وعشان كدة ومنعًا لأي إصابات إليكِ بهذه الخطة الشريرة في خطوات :

1-لو هتتقابلوا الساعة 5 قولولها الميعاد الساعة 2ونص وهي كدة كدة هتتأخر بس في نفس الوقت برضة هتوصل قبلكوا وهتفضل لوحدها في الشارع تقاسي ويلات الزهق إللي زهقتهولكوا قبل كدة .

2- لو هي من النوع إللي لازم حد يفكرها بميعاد الخروجة زنوا عليها كل دقيقة وكل ثانية لحد معاد الخروجة ومش بس كدة خدوا نفسكوا وروحولها بيتها وإفضلوا زنوا عليها لحد ما تلبس وتجهز وبكدة تبقوا ضمنتوا إنها هتنزل في معادها وكمان هتكونوا زهقتوها في عيشتها .3- ممكن تتفقوا معاها على إنكوا تنزلوا يوم معين وفي اليوم دة ولما تتأكدوا إنها نازلة أو خلاص نزلت قولولها : معلش مش هنعرف ننزل النهاردة .

4- وأخيرًا وعشان تتخلصوا من العادة دي نهائيًا ممكن تتفقوا على التحضير لمناسبة ما وليكن عيد ميلاد حد فيكوا مثلًا وتدبسوها في إنها تجيب معاها كل الحاجات إللي هتستخدموها في عيد الميلاد وبالذات الحاجات التقيلة وبكدة هتيجي غصب عنها في ميعادها وكمان هتعاقبوها أشد عقاب.