7 أشخاص هتقابليهم فى المواصلات

تجربة المواصلات دي تعتبر من أسوأ وأخطر المغامرات اليومية اللي بنقوم بيها مضطرين، مغامرة بنبقى شايلين همها من أول ما بنصحى من النوم، بنقابل فيها مواقف كثيرة ووشوش كثير مش كلها طيبة للأسف.

1-الفضولي
هتلاقيه طول الطريق مركز معاكي، فتحتي شنطتك، بتتكلمي فى الموبايل، فاتحة الفيسبوك، لو بتقرأي هتلاقيه متابع معاكي كل حرف، وده عادة

2-اللي مش طايق نفسه
طول الطريق متعصب وبيستغفر و بيتلكك عشان يتخانق مع باقي الركاب نصيحة تجنبيه.

3-المتحرش
سواء بإيده ولا بعينه ولا بلسانه، دايما بتلاقي شخص كده بيبصلك نظرات غريبة مريبة ده متحرش خدي بالك منه.

4- المستعجل
ده ببقى قاعد مش على بعضه بيبقى هاين عليه ينزل يطير عشان يوصل فى معاده، وطبعا بيسبب التوتر لكل اللى حواليه معاه.

5-السواق
أهم شخصية فى مغامرة المواصلات بتختلف الوشوش يوميا بس هو هو نفس السواق اللي بيفضل يقنعك أن العربية واسعة جوا رغم أن مفيش مكان.

6-الحبيب

ده هتلاقيه منتحل وظيفة تسلية الناس في المواصلات، هتلاقي نفسك غصب عنك مركزة معاه وبتضحكي، وهتلاقي مش لوحدك اللي مركزه معاه، معظم الركاب مركزين، وهتلاقى تعليقات الستات الكبيرة "معلش تلاقيه لسه خاطب"

7- الشيخ

هتلاقيه طول الطريق ماسك مصحف وبيقرأ بصوت عالي، وتعليقاته على كل اللي حواليه، أنت مسقط البنطلون ليه يا بني؟ أنتى لابسه بنطلون مقطع ليه يا بنتي؟ أنتو جيل ما يعلم بيه إلا ربنا.. وتعليقات من هذا القبيل.