معاكي V.S مع أصحابه

"مكتئب ! غريبة ده  مبيبطلش ضحك معانا "

" ده أكتر واحد كريم في صحابنا كلهم إزاي بتقولي كده عليه !"

" ده ذوق جدًا مع كل صحابنا البنات "

الجُمل اللي فاتت دي بتتكرر على مسامع مُعظم البنات المُرتبطة من أصحاب الشخص المُرتبطة بيه، وده مش بسبب وجود عيب فيكي أو فيه ولكن بسبب وجود عيوب في علاقتكوا ببعض خلته يتعامل مع أصحابه بشكل أحسن كتير من تعامله معاكي.

من أهم المشاكل اللي بتسبب الخلل ده وأهم طُرق علاجها:

1-مُعظم الوقت اللي بتقضوه سوا بيكون عبارة عن خناقات لأنكم ببساطة مش بتتناقشوا وبتفضلوا الخلاف، نتيجة لده بيفضل وقته مع صحابه عن وقته معاكي.

الحل: مينفعش الحياة يكون كلها خناقات وعشان كده لازم تتناقشوا وتحطوا قواعد لعلاقتكوا وابدئي بنفسك وفهميه ليه إيه، وعليه إيه وواحدة بواحدة المشاكل هتتحل بشكل ودي أكتر.

2- مفيش بينكم مُشاركة في مُعظم المواضيع وعلى العكس بيلاقي مع صحابه ده.

الحل : ببساطة شاركيه اهتماماته و ده مش معناه إنك طبعًا تبقي لاغية شخصيتك ومهتمه باهتماماته بس، لكن حاولي على قد ما تقدري تشاركيه.

3- مش معوداه على فكرة إنك ليكي شخصية مُستقلة وبالتالي بيعاملك بقلة ذوق، عكس تعامله تمامًا مع صاحباته البنات.

الحل: لازم يفهم من الأول إنك ليكي شخصيتك وكرامتك ولازم يفهم إن أي علاقة في الدنيا ليها حدود وأي علاقة مبنية على "الكرامة".

4- وأخيرًا، عودتيه إنك دايمًا بتدي ومبتاخديش بالذات في حتة الهدايا في المناسبات وغير المناسبات، وده زود عنده جزئية اللامبالاة ناحية متطلباتك وتحولت بالتدريج لـ "بُخل".

الحل: لازم زي ما بتحطي من الأول حدود للعلاقة حطي معاها أساسيات للأخذ والعطاء عشان تقدروا تتعايشوا.