”مسكت ايد بنتي كام مرة ياض”.. أغرب أسئلة الأبهات للعرسان

على مر السنين والعصور و مع اختلاف الزمن هيفضل "الجواز" هو الشئ الأكثر رعباً  للشباب و للبنات فى نفس الوقت، مشهد والد العروسة و هو مركز تماما على الفريسة قصدي العريس وأم العروسة وهى بتعد في قايمة الطلبات والعروسة وهى حاطة وشها في الأرض من الكسوف، مشهد مُتكرر بنشوفه في السينما وفي الواقع كمان.

احكي قررت تمسك العصاية من النص المرة دي و نشوف معاناة الطرف التاني، سألنا المتزوجات حديثاً  "إيه أغرب سؤال جوزك اتسأله من أبوكي!" .

وكانت الردود كالتالي

أنت شيخ ، طب جاي تتجوز بنتي ليه يا بني ؟.. دي مُنفلتة

 

 

بابا طلب منه يعمل تحليل مخدرات.

 

 

بابا طلب منه يجيب معاه وهو جاي شهادة تخرجه، عشان يتأكد أنه مهندس.

 

 

بابا قاله إيه ده أنت لابس بنطلون أحمر ، ده أنا بنتي ملبستهوش؟ ، بس الصراحة هو كان نبيتي وأقنعت بابا بعدها أنه بقى عادي دلوقتي .

طب وريني البطاقة كده؟ ، مكنتش عارفة هو بابا بيسأله عشان شاكك فيه ولا عاوز يشوف الصور عشان يذله طول عمره.".

 

بابا شك أن احنا كنا بنحب بعض ، ولقيناه تلقائيا بيقول " تعالى هنا ياض ، مسكت ايد بنتي كام مرة ؟" ، قاله ايد بنتك طاهرة يا عمي.

 

بتشخر وأنت نايم يا بني؟ ، جوزي رد علي رد عليه انا مش هكذب عليك يا عمي، أنا بعمل كدة وأنا صاحي .

 

كنت قاعدة أنا وهو وبابا، لقيت بابا بيقولي ادخلي جوه دلوقتي، دخلت ولقيت بابا بيقوله ، "أنت عاوز تتجوز ليه يا بني ؟" ، بعدين لما قعدت معاه قالى ابوكي بيسأل اسئلة فلسفية وأنا تافه أصلا.

 

بابا سأله قدامي، "عرفني كده من الأخر انت ابن أمُك ولا لاء ؟".

 

هو مكنش سؤال بابا طلب منه طلب غريب، قاله يا بني أنا كل اللي عاوزه منك متخليش بنتي تروح تقف على الطابونة تشتري عيش، ابقي روح أنت .