”الراجل الخبرة”.. اعرفي أضرار الارتباط براجل مقطع السمكة وديلها

معظم البنات دلوقت بتميل للراجل الخبرة، بتحس أنها مميزة عشان واحد اختارها هي من ضمن بنات كتيرة قوي بس مع الوقت بتتأكد أنها كانت غلط في البداية، واللي فاكراه "بقي على نياته وأن كل البنات بقت أخواته" بمجرد انه شافها، بتتأكد بمرور الوقت أنها هي اللي على نياتها، وأن ديله عمره ما هيتعدل.

"احكي" سألت البنات اللي كان ليها تجربة في الموضوع ده، وعرفت إيه أضرار الارتباط بيهم.

1- الراجل "الخبرة" مبيملاش عينه غير التراب زي ما بيقولوا، يعني لو أنت شايفه أن خلاص ربنا هداه وعقل، فأنتي غلطانة لأن دي مجرد مرحلة ليس إلا، وهترجع المياه لمجاريها وهيرجع تاني زي ما هو.

2- فكرة أنك ترتبطي براجل "خبرة" ده معناه أنك تتحولي من واحدة طبيعية لفاشونيستا، لأنه طبيعي طالما راجل "خبرة" يبقى حواليه بنات كتير وأشكال وألوان وأنتي عشان تحافظي على علاقتك معاه مضطرة تخلصي فلوسك على اللبس والمكياج.

3- أنتي نفسك هتتحولي من شخصية طبيعية لشخصية شكاكة جدا، غير أنك هتشكي فيه طول الوقت، هتشكي كمان في نفسك وشكلك وبعدين الأمر هيتطور وهتشكي في كل اللي حواليكي ودي نقطة كفيلة أنها تدمرك.

4-  هتفقدي نفسك في العلاقة دي، يعني هتلاقي نفسك تدريجيا بتتحولي لواحدة أنتي متعرفيهاش، هتخسي وطول الوقت هتبقي مكتئبة وزعلانة لأنك حاسة دايما بالذنب ناحية اللي بتحبيه وده طبعا الإحساس اللي هو موصله ليكي كل أما تواجهيه بخياناته، مش أكتر.

5- عمرك ما هتوصلي لسقف طموحاته، بمعني أنك دايما هتعملي كل حاجه بس علشان ترضيه مش أكتر، يعني عايشة حياتك عشانه بس.

6- مش هتحسي بالأمان أبدا معاه، لأنه دايما مقضيها معاكي ومع غيرك.

7- غير أنك هتبقي شكاكة، هو كمان طبيعته الشك لأن ده واحد لافف وعارف، عرف كل أنواع البنات اللي تتخيلها، فلازم يشك فيكي.