أفكار ممكن تنفذيها في السنوية الأولى لانفصالك أو الـ (Breakup Anniversary)

ساعات بنتعلق بأشخاص ونتخيل إننا هنكمل حياتنا معاهم من غير ما نأخد بالنا من تدخل الظروف اللي حوالينا، فنتفاجئ بإن كل اللي توقعناه ما كانش حقيقي ويجي وقت الانفصال.

يوم الانفصال عادةً مش بيتنسي في المواقف اللي زي دي.. عشان كده جمعنا ليكي شوية أفكار من بنات مروا بنفس التجربة وده اللي بيعملوه يوم ذكرى انفصالهم.

• ممكن تحضري حفلة لوحدك أو مع صحابك، حسب المود اللي حابة تكوني فيه.
• سافري لو تقدري، حتى لو لمكان قريب مش شرط تقطعي مسافة كبيرة عشان تغيري الأماكن اللي حواليكي.
• شاركي في نشاط خيري في اليوم ده، ممكن تقضي اليوم في ملجأ للحيوانات هتتبسطي بمحاوطتهم ليكي، وممكن تتبنّي حيوان في اليوم ده ويفضل مرافقك على طول.
• لو بتحبي الأفكار الجريئة هاتي هدية وقدميها للشخص اللي كان معاكي في العلاقة.
• مارسي طقوس دينية لإنها بتسبب الهدوء والسكينة، زي حضور حضرة أو قضاء اليوم في الكنيسة.
• ابدئي اتعلمي حاجة جديدة في اليوم ده، اشتركي في ورشة للأعمال اليدوية لو بتحبيها، أو رياضة معينة، أو يوجا.
• جمعي أصحابك البنات واعملوا حفلة بمناسبة ذكرى الفركشة، واتجننوا فيها.
• شوفي فيلم جديد في السينما "بس لازم تعملي سرش كويس عن ردود الفعل حوالين الفيلم قبل ما تدخليه علشان لو طلع وحش اليوم هيزيد سوء".
• روحي ملاهي واركبي لعبة خطر، واصرخي وزعقي براحتك.
• اعملي أكتر حاجة كان بيكرهها وبيمنعك تعمليها.