”احكى” بتقولك إزاى تعرفي إن الولد ده عارفك ”مصلحة”

عادة البنات بتبقى جدعة بزيادة يمكن أجدع من الولاد عشان كدة أغلب الولاد بيحبوا يبقى فى قايمة صداقاتهم بنت، تعرف تسمعه و تطبطب عليه و تنور و تمشي على الحيط لو بس طلب منها بس مش دايما بيبقى كلهم يستهلوا جدعنتك معاهم.


1- هيقولك إنك أقرب صاحباته، أنتي هنا وقعتى فى فخ، وهيتعامل معاكى على أنك واحد صاحبه، "عاش ياوحش".

2- فى الحزن هتلاقيه بيجرى يحكيلك ووقت مايبقى الدنيا تمام معاه، مش هتشوفى وشه، ده اللى أنغام غنتله "طول ما أنت بعيد أنا بطمن إن أنت بخير".

3- لما تطلبي منه حاجة حتى لو بسيطة  هتلاقيه اتهرب بحجة أنه مش فاضى.

4-هيقولك أنك جدعة، لحد هنا تمام لحد ما هتوقفى جدعنتك دي، وقتها هيختفي.

5- جربي افتحي الشات بينكم كده وشوفي المرات اللى كلمك فيهم لو بعد جملة "عاملة إيه" كلمة "بقولك إيه"، اتأكدي أن الشخص ده مصلحجى و ساعتها "اجري يا مجدي".

6- مبيدافعش عنك، لما تيجي سيرتك بيعدي اسمك عادي كأنه أول مره يسمعه، ولو حتى الكلام وحش ومش مضبوط مبيحاولش يحسن صورتك.

7-مبيقولش الحقيقة حتى لو طلبتي رأيه فى حاجه، بيكذب ويدعي بكلام، ويلف ويدور ولما تواجهيه بيقولك "معلش أصل أنا مكنتش عاوز أخسرك".

8- معظم مكالماته ومقابلاته بتنتهي بمشاكل مادية بينكوا، أخد فلوس سلف ومرجعهاش أو بيطلب فلوس جديدة، ولو لاقيتي الشخصية كدا ابعدي عنها على الفور.