كيف تُطفشين عريسا في خطوات بسيطة؟

البنت أول ما بتخلص مرحلة الثانوية وتدخل مرحلة الجامعة، بتلاقي معظم الكلام معاها بيتمحور حوالين "مش هنفرح بيكي بقى"، القعدة مع ماما وتيتة وعمتو وخالتو بتدور حول "يارب أشوفك عروسة يارب"، وطبعا كلهم بيحاولوا بكل الطرق يوفقوا بينها وبين عرسان، وتتحول حياتها لمقابلات عرسان تكاد تكون مش مٌتقبلاهم بس هي مش قادرة ترفض بسبب أهلها، فبتضطر تقعد معاهم..إحنا عارفين إن دي أزمة كبيرة، وعشان كده قررنا نعرفك إزاي تطفشي العريس لو مش عايزاه بخطوات بسيطة:

مرحلة الوالدة:

طبعا طنط والدته لازم تيجي الأول تتطمن ابنها ناوي يتجوز مين..

-فهميها إن عندك عندك شخصية قوية ومستقلة، حتى لو أنتي تافهة عادي، هي طبعا مش هيعجبها الوضع ده لأنها مش هتقدر تمشي كلمتها على ابنها ولا عليكي.

-قوليلها صراحة كدا، يا طنط أنا مبعرفش أعمل أكل، ولا ناوية أتعلم، الموضوع ده بيضايقهم جدًا.

لو والدته مطفشتش يبقى تدخلي على مرحلة التعارف الأول:

-  في ليلة كئيبة هتلاقيه جاي هو ووالدته، يشوفوا العروسة اللي هي أنتي، وهتبقي مضطرة تقعدي معاهم، لذا اتأخري على قد ما تقدري، ولو استنوكي خليكي مرتضى منصور في نفسك وردي بتلقائية " شكلي جيت بدري ولا إيه!".

- اقعدي ساكتة، ولو سألوكي ساكتة ليه، قوليلهم أصلهم قالولي اسكتي طول المقابلة عشان لو اتكلمت هبوظ الدنيا وهما خايفين من كدا.

-   طبعا بعد كده هتقعدي أنتي وهو سوا، اتفقي مع واحدة صحبتك قبلها تقعد ترن عليكي، وانشغلي بالموبايل ونفضيله وهو طبعا هيفهم إنك مرتبطة، بس هيطنش.

-   اغلطي في اسمه، يعني لو اسمه أحمد خليكي مصرة أنه اسمه محمد، هيضايق جدا من الحركة دي.

-    خليكي مُتحمسة لحقوق المرأة في القعدة دي، ووجهي له سؤال "تعرف إيه عن حقوق المرأة يا فندم"، بس هو كده عرف إنه هيغلط غلطة عمره لو الجوازة دي تمت.

-   اقعدي بصي في السقف واضحكي لوحدك، عقله الباطن هيفضل يزن عليه بطريقة غريب: "هي مكسوفة ولا عبيطة"، بس سيبك من كل ده استمري أنتي في الضحك والبص للسقف، هيطفش متقلقيش.

-    لو هو مصمم بقى على خطوبة وكدا، اتخطبي مفيش مشاكل بس قوليله مش عاوزة فترة خطوبة قصيرة إحنا لازم نتعرف على بعض ، وهنا لازم تتحولي للمحقق كونان، وخلي صحبتك تكلمه من رقم غريب ولو رد ومشي معاها على الخط يبقى تسجلوا المكالمة وتقوليله الحياة معاك مستحيلة أنت خاااااين.