6 حاجات البنات هتقدر تعملها لو الشوارع أمان
الأكثر مشاهدة
مين مننا مش بتحلم، أنها ماشية في الشارع لابسة اللي بتحبه، وبتعمل اللي نفسها فيه، من غير بقى ما تسمع كلام يضايقها أو تحاوطها نظرات الناس، اللي ممكن تحسسها أنها مش مرتاحة ولا حاسة بالأمان، رغم أن المفروض أن شوارعنا تكون بتحترم اختيارتنا في الحياة، وحريتنا في أننا نعمل اللي بنحبه، طالما مش بنأذي حد.
الوضع يمكن مش دايما سيء، وفي أوقات بنعرف نعمل فيها اللي بنحبه، رغم أنه ده بيتطلب مننا مجهود كبير، عشان نختار الوقت والمكان المناسبين، وده بيحسسنا أننا مقيدين أكتر، بالذات إذا كانت الحاجات دي طبيعية وتلقائية ومش بتضر حد، وهتخلينا نحس أكتر بالحرية ونحب الأيام اللي بنعيشها.
اقرئي أيضا: 12 نشاط غير مكلف لتستمتعا بهم معا وتصبحان أقرب
أكيد الحاجات اللي بتسعدنا مختلفة عن بعض، لكن الفكرة هي إزاي نحترم سعادة الناس اللي حوالينا ونقدر اختلافاتنا، ويعيش كل واحد بالطريقة اللي تريحه، ونعمل الحاجات البسيطة اللي ممكن تغير مودنا من غير ما نسمع تعليقات تزعجنا، أو نتحرج من نظرات مليانة ضيق واستنكار للي بنعمله.
عشان كده هنتكلم عن الحاجات اللي أغلبنا- كبنات- بنتمنى نعملها في الشارع، يمكن يجي يوم ونحققها.
1-نجري في الشارع
حاجة عادية.. صح؟ سمعاك أهو وأنت بتقول ما تجروا عادي هو فين الإنجاز ولا المشكلة في ده؟
يؤسفني أقول إنه جري البنت في الشارع لو حصل بيبقى مشكلة كبيرة، أولا "عيـــــــــــــب"، إزاي تقرري تجري في الشارع وتحركي جسمك، وتكوني ملفتة للناس اللي حواليكي، وكمان "أنتي بنت" صورتك في وسط الناس واحترامك لنفسك، وتعليقات تانية كتير ملهاش أي علاقة برغبتنا في أننا نعمل رياضة مهمة لأجسادنا وصحتنا، ونمارس حق طبيعي جدا.. ده غير إن الرصيف مثلًا للموتوسكلات مش للناس أصلًا.
2-نلبس زي ما نحب
مين فينا ماشفتش صور مامتها وجدتها وهما لابسين فساتين شيك وبيتمشوا وبيروحوا الجامعة عادي، ومين ما شافتش فستانين الخمسينات والستينات وحلمت تلبسها في يوم بس للأسف شوارعنا ضد الجمال..
مثل زي "كل اللي يعجبك، والبس اللي يعجب الناس" بقى قانون رغم إنه مش حقيقي، لأننا ممكن نأكل اللي يعجبنا ونلبس اللي يريحنا برضه، فيها إيه لو قررت أي بنت تلبس فستان وتنزل الشارع؟ ليه تعيش في خوف وقلق من التحرش والمتحرشين ونظراتهم؟ وتسمع كلام الستات قبل الرجالة عن أنها لازم تحترم نفسها، من غير أي اعتبار أنه اللبس ده حرية شخصية، واختيار يخص كل واحد.
واللبس مش لازم هيكون فساتين قصيرة وهوت شورت، الفكرة أنك تختاري الألوان والستايل اللي يناسبك ويريحك، ليه يكون لبس البنت دايما محل اهتمام ومناقشة من الناس كلها، ويبدأوا يتحكموا في المظهر اللي لازم تكوني عليه.
اقرئي أيضا: عادات سيئة عليك التخلص منها كامرأة ناضجة
3-ممكن نلعب كمان
ده بقى مش بس حلم، ده حاجة من المستحيلات، يعني الولاد ممكن يلعبوا كورة أو يتجمعوا ويفقوا في أي مكان يتكلموا ويضحكوا، لكن أي تجمع بنات في الشارع هو غلط وغير مسموح بيه، و"أكيد واقفين علشان يستفزوا الشباب" وكل الكلام السخيف والسيء ده.
مع أنه ممكن من حقنا نلعب ونتجمع ونضحك ونعمل اللي نفسنا فيه، ليه مثلا الشارع ميتحملش يشوف بنات بيجروا ورا بعض أو بيلعبوا كورة، الشوارع ملكنا كلنا، اللي بيعمله الولاد وبيكون مقبول، ليه يترفض من البنات بس "لأنهم بنات"؟.
4-أو نغني/نعزف
يمكن دي أكتر حاجة بسيطة تتمنى كل البنات تعملها، تمشي مع أصحابها ويغنوا مع بعض اللي يجي في بالهم، من "الدنيا ريشة في هوا" لـ "باين حبيت"، ويحسوا بس للحظات أنهم طايرين ومبسوطين مش شايلين هم حاجة، وقادرين يعملوا كل اللي نفسهم فيه، واللي عندهم مواهب ممكن يطلعوا يعزفوا للناس في الشارع عادي ويكونوا لمسة جمال في يومهم.
اقرئي أيضا: علامات تخبرك انه لا يحبك بل يريد امتلاكك
5-نخرج في أي وقت
الكل بيقول القاهرة أحلى وقت الفجر، بس معظم اللي بيقولوا كده أولاد، لأننا بنات ومايصحش نزل في الوقت ده لوحدنا رغم إننا بلد ليلها زي نهارها مش بنقفل من المغرب زي الدول الأجنبية، لكن ده للأولاد بس مش للبنات.. طبيعي أنه في أماكن الخروج فيها وقت معين ممكن يكون مش أمان للكل، لكن إيه اللي يمنع لو أي بنت قررت تنزل تتمشى في الوقت اللي هي شايفاه مناسب ليها، من غير ما تجهز قايمة بالحجج والتبريرات.
طيب نخرج نتمشى على النيل بعد الفجر طيب؟
6-العجل هيبقى وسيلة مواصلاتنا
طبعا، لو شوارعنا مفيهاش "هاتي لفة"، و"لا لا ميصحش كده" هنقدر نركب عجل ونروح بيه أي مكان نحبه وفي أي وقت، وكمان لو فيه أمان بمنعى مكان مخصص للعجل ما يدخلهوش ميكروباص ولا يكسر علينا تاكسي.. تخيلي كم الحرية والانطلاق لو بتقضي مشاويرك بالعجلة؟ الفكرة بس تبسط.
قولي لنا نفسك تعملي ايه؟ بس "الشارع" بيمنعك.
اقرئي أيضا:
أفضل المجاملات التي تحب النساء سماعها وكذلك أسوأها
الكاتب
احكي
الخميس ٣٠ مايو ٢٠١٩
التعليقات
لا يوجد تعليقات
اترك تعليقا