حاجات تشجعك تبدأي كارير جديد بعد التلاتين

بتفكري كام مرة في اليوم تعملي كاريير شيفت؟ كتير؟ طب ايه اللي بيمنعك؟ الحقيقة أشياء كتير تمنعنا من التفكير في الكاريير شيفت أو تغيير مجال العمل والذي قضينا فيه الكثير من السنوات وأصبح لدينا خبرة كبيرة فيه. فما الذي يتغير بعد سن التلاتين؟ وايه اللي ممكن يشجعنا نغير مجال شغلنا اللي بقالنا فيه سنين؟ أسباب كتير وكلها ممكن تشجعك تطوري نفسك وتلاقي شغل بتحبيه وتكتشفي نفسك من الأول...

عايزة أعمل كارير شيفت

تغيير مجال شغلك بعد التلاتين ممكن يكون صعب شوية لكن مش مستحيل. الحاجات دي هتشجعك تاخدي الخطوة لو مترددة وتبدأي في مجال جديد بتحبيه...

1- سن الثلاثين فيه مُميزات أكتر من العشرينات

رغم أنك ممكن تفكري أن في سن التلاتين الموضوع يبقى أصعب أنك تغيري شغلك اللي أخدتِ فيه خطوات كويسة وقضيتي فيه عشريناتك كلها، إلا أن سن التلاتين قد يكون أفضل وقت للتفكير في الموضوع ده. لأنك بتقضي العشرينات في أنك تثبتي نفسك بعد دراسة الكلية، وتحاولي تطوري مهاراتك، وتلاقي فرص شغل كويسة. كمان في العشرينات بتبدأي من الصفر بدون خبرة سابقة في مجال عملك. بس في سن التلاتين بتكوني حققتي حاجات كتير وأصبحتِ أكثر درايا باللي انتي عايزاه واللي انتي مش عايزاه. وفي سن التلاتين كمان بتكوني أكثر ثقة في نفسك وأكثر واقعية وبتحسبي الأمور بحكمة أكتر. كل الحاجات دي هتخليكي قادرة تاخدي قرار واضح أنك تغيري مجال شغلك وتدوري على مجال بتحبيه ونفسك تحققي فيه أهداف جديدة وتبني نفسه وتثبتي قدراتك فيه من الأول.

2- بقيتي عارفة أنتي عايزة ايه

يمكن تقرأي الجملة دي دلوقتي وتضحكي لأنك ممكن تكوني بدأتي سن التلاتين ولسه مش محددة أوي أنتي عايزة ايه. بس دي نظرة سطحية شوية لقدراتك ومهاراتك. لأنك بعد سنين في الشغل والتعامل مع الناس والخبرات اللي اكتسبتيها في سنوات العشرينات، بقى عندك نظرة مختلفة للأمور. بقيتي محددة أكتر ايه اللي بتحبيه وتقدري تعمليه أو حتى تتعلميه، وايه الحاجات اللي انتي عارفة انك مش عايزاها. ولو قارنتي نفسك دلوقتي بأول ما اتخرجتي من الكلية هتعرفي الفرق.

اقرئي أيضا: كيفية الحصول على وظيفة بدون خبرة سابقة

3- بقيتي عارفة قيمتك أكتر

نقطة مهمة جدا كلنا ممكن مانكونش بنفكر فيها، أنك تعرفي قيمتك وتقدريها. والتقدير هنا ماديا ومعنويا. بمعنى آخر، في بداية العشرينات كان ممكن تقلبي شغل بمرتب قليل جدا، أو في منصب صغير. لكن مع دخولك للتلاتين وسنين الخبرة بتاعتك حتى لو في مجال مختلف فده بيديكي قيمة مهنية أكبر. وبتبقي قادرة تفهمي أن العلاقة بين الموظف والشركة بتحقق مصالح للطرفين، يعني زي مانت يهمك تشتغلي الشركة كمان هتستفيد منك ومن خبرتك، وبالتالي بتقدري تتفاوضي على مرتب ومنصب مناسبين ليكي.

4- الخبرات اللي اكتسبتيها ستساعدك في عملك الجديد

مهما كان مجال العمل المختلف اللي هتختاريه بعد التلاتين، فأنتِ مش هتبدأي زي ما بدأتي في أوائل العشرينات. بالعكس، خبراتك اللي اكتسبتيها وكل حاجة اتعلمتيها في الشغل والكورسات والجامعة هتكون زي السلالم الأولى في مشوارك اللي هتختاريه بعد التلاتين في الشغل الجديد. لأن الشغل مش بس بيخليكي تتعلمي حاجات في المجال، لأ ده كمان بيساعدك تكويني علاقات مع ناس، وتعرفي ازاي تتعاملي مع مديرك وزمايلك وبيئة العمل عموما. وكمان بيعلمك قواعد وأُسس عامة عن طريقة الشغل وسياسة الشركات وحقوق الموظفين. كل الحاجات دي هتساعدك في أي مكان أو مجال شغل تاني حتى لو كان مختلف. وهتخليكي تتعلمي أسرع لأنك تقريبا عارفة الأساسيات، وتقدري توصلي للي انتي عايزاه بطريقة أسهل.

اقرئي أيضا: 15 مجال عمل ضمن الوظائف الأعلى أجرا للنساء

5- لما تحسي أنك مش بتضيفي جديد لمجالك

بعد وصولك للتلاتين أو الخامسة وتلاتين، ممكن تحسي أنك اديتي كل حاجة لمجالك وشغلك ومابقاش عندك جديد تضيفيه. وبتحسي أن روتين الشغل أصبح ممل جدا وأنك حتى مابتتطوريش ومافيش جديد. في اللحظة دي ممكن جدا تفكري في تغيير الكاريير وبداية شغل جديد تقدري تحققي فيه أهداف مختلفة.

6- عايزة مرتبك يزيد

بعد مرور سنوات في نفس المجال بتحاولي تثبتي نفسك فيه وتطوري من نفسك، ممكن تحسي أن مرتبك ودخلك المادي في المجال ده أقل بكتير من احتياجاتك. وده سبب مهم يشجعك أنك تغيري كاريرك، وممكن جدا تبدأي كاريير جديد وبالمهارات والخبرات اللي عندك تقدري تطوري نفسك بسرعة ويدخلك مرتب أكبر. والعائد المادي في أي شغل نقطة مهمة لازم تحطيها في حساباتك، صحيح هى مش كل حاجة لكنها مهمة لأنها مش بس بتأمنلك حياة كويسة لأ كمان ممكن تساعدك تطوري نفسك في الشغل زي أنك تاخدي كورسات أو تحضري ورش تساعدك تبقى أفضل.

اقرئي أيضا: أفكار مشاريع صغيرة في المنزل بجانب الوظيفة

7- عايزة تتعلمي حاجات جديدة ومختلفة

بسبب ضغط الشغل والجري المستمر في فترة العشرينات، ممكن جدا مايبقاش في وقت تتعلمي حاجات تانية بتحبيها برضو. وممكن يكون مجال شغلك كويس بس أنتِ عندك شغف وحب لحاجة تانية. وكمان ممكن يكون مجال عملك مش بيواكب التطور وعايزة تتعلمي مهنة من مهن المستقبل ودي حاجة ممكن تشجعك جدا أنك تبدأي كاريير جديد وشغلك الجديد هيساعدك تتعلمي حاجات أكتر وتعرفي مهارات مختلفة.

8- وضعك المادي مستقر

رغم أن زيادة الدخل من أسباب الكاريير شيفت، بس ممكن جدا لو وضعك المادي مستقر تقدري تسيبي شغلك الحالي وتدوري على مجال تاني تبدأي فيه من جديد. لأن الالتزامات المادية المتتالية ممكن توقف ناس كتير عن أنهم ياخدوا القرار ده ويستمروا فيه. فلو ماعندكيش مسئوليات مادية أو عندك فائض مادي كويس، ممكن جدا تفكري في تغيير مجال شغلك وتروحي لحاجة بتحبيها.

اقرئي أيضا: تعرف على أسوأ أنواع الموظفين وهل أنت من بينهم

9- ده وقت أن يبقى عندك شغلك الخاص

ستات كتير عند سن التلاتين وتحت الثلاثين كمان بتحقق إنجازات كبيرة أكبر من عمرهم. عشان كده التلاتين سن مناسب أنك تقدري تفكري أن يبقى عندك شغلك الخاص. ومش شرط أن يكون في نفس مجالك، ممكن تفكري في مجال مختلف وتبدأي تتعلمي أساسياته وتفتحي مشروع خاص بيكي، تبقي مديرة نفسك يعني.

10- أنك ماخترتيش شغلك الحالي

أوقات كتير بنقبل اللي بيتفرض علينا بعد التخرج وممكن يمر الوقت وإحنا مش حابين المجال اللي بنشتغل فيه رغم أن ممكن نكون ناجحين فيه. في اللحظة دي بيجيلك إحساس أن مش دي المجال اللي عايزة تكملي فيه للآخر. ابدأي فورا في دراسة حاجة جديدة بتحبيها واختاري الشغل اللي انتي عايزاه وفقا لمعاييرك أنتي.

افتكري دايما أن مافيش حاجة مستحيلة وانتي دايما تقدري، أهم حاجة تدرسي قرارك كويس من كل الجوانب وتعرفي إذا كنتي قادرة فعلا تاخدي قرار زي ده ولا لأ. وفي الآخر كل حاجة اتعلمتيها مش هتضيع لأنها هتفيدك في أي شغل جديد هتروحيه.