علامات بتقولك أنه مش الزوج المناسب
الأكثر مشاهدة
ناس كتير بتفتكر أن الحب والزواج شىء واحد، أو أن الحب دايما لازم تكون نهايته زواج. لكن ده مش صحيح، لأن الحب عاطفة مش محسوبة وممكن نحس بيها في أي وقت وبدون أسباب. لكن الزواج مشروع حياة ولو هنكمل فيه لازم نكون فاهمين شخصية شريك الحياة كويس. الشخص اللي بنختار اننا نعيش معاه ونكمل الرحلة للآخر. عشان كده فكرت أني ممكن أشاركك بصفات لو موجودة في حبيبك يبقى هو مش الزوج المناسب اللي ممكن تكملي معاه ومنها...
صفات الرجل الذي لا يصلح للزواج
1- كذاب
ماينفعش تتجوزي حد بيكذب عليكي ولو حتى في حاجة صغيرة، لأنه ببساطة معناه أنه بيخبي عليكي حاجات كتير ودي حاجة ماتنفعش في حياة مشتركة بين اتنين. الكدب مالوش تبرير وشريك حياتك لازم يكون صادق معاكي في كل حاجة ويشاركك الرحلة بكل تفاصيلها.
2- بيقلل منك
صعب جدا تعيشي مع راجل بيقلل منك أو من أهلك، شايفك قليلة طول الوقت. بيحبطك، بيحاول يكسرك أو يتفه من أي حاجة بتعمليها وأي نجاح بتحققيه. بعد شوية نظرتك لنفسك هتتغير ومش هتقدري تكملي بالإحساس ده. خصوصا أن أغلب الرجالة اللي بتعمل كده بيكون ده نابع من عقدة نقص عندهم أو أنه مش عايز حد يبقى أحسن منه.
اقرئي أيضا: 5 أمور تمكنك من استعادة الثقة في علاقتك بشريكك
3- الأنانية
الجواز مشاركة وعيلة وبيت ومسئوليات، والزوج الأناني بيكون سبب رئيسي في فشل مشروع الجواز بشكل أو بآخر. الأنانية بتخلي الشخص مايشوفش غير نفسه، وده معناه أنه بيفضل نفسه على شريكته وعلى عيلته وعلى أي حاجة تانية.
4- البخل
البخل مش بس ماديا، رغم أنه برضو عيب كبير في أي راجل. البخل ممكن يكون في المشاعر، في العطاء عموما. ماتتجوزيش راجل بخيل في أي حاجة، لأن الحياة معاه بتكون صعبة ومُتعبة. وبيحصل جفاء في العلاقة العاطفية بعد فترة من الجواز بسبب بخل الراجل.
5- بيوعد ومابيوفيش
في نوع من الرجالة بيوعد بس! بيقول كلام في الهوا، كلمته مش بتتنفذ حتى ولو بعد وقت. الصفة دي بشعة! لأنها هتعشمك بحاجات كتير ممكن ماتحصلش. الأهم في أي راجل أنه اللي بيقولهولك يعمله، ولو أفعاله سابقة كلامه يبقى أفضل.
اقرئي أيضا: أسئلة تخليكي تعرفي هو بيحبك فعلا أو لأ
6- متسلط وبيحب السيطرة
ماتقبليش أبدا براجل متسلط، أو بيحب السيطرة وبيحاول طول الوقت يفرض كلامه عليكي. يفرض سيطرته على قراراتك مهما كانت صغيرة. الصفة دي قادرة أنها تمحي شخصيتك وتخليكي مُجرد تابع للزوج مش شريكة حياته.
7- لا يتحمل المسئولية
صحيح أن الجواز مسئولية مشتركة بين الطرفين، لكن الزوج اللي ماعندوش استعداد يتحمل مسئولية زوجة وبيت وأطفال كمان بتبقى الحياة معاه مُخيفة ومافيهاش أمان. انك تعتمدي على نفسك ده شىء كويس لكن أنك تحسي أن جوزك لا يُعتمد عليه عشان كده بتضطري تعتمدي على نفسك بس دي حاجة مش صحية في أي علاقة عاطفية.
8- ماعندوش طموح
مش كل الناس زي بعض، ومش كل الناس لازم تبقى مُميزة وعايزة تحقق المستحيل. لكن التطلع لمستقبل أحسن مش عيب، الراجل اللي ماعندوش طموح هيخليكي واقفة محلك سر، مش هيبقى عايز يطور نفسه أو شغله، مش هيهمه أوي أنكوا تشتروا بيت أحسن، أو تحسنوا دخلكوا. مش هيفرق معاه أن الأولاد يدخلوا مدارس أفضل، كل ده مع الوقت هيحسسك بالعجز لأنك هتبقي عايزة تعيشي أحسن بس عدم طموح جوزك بيكتفك.
اقرئي أيضا: بعد العلاقات التوكسيك... هذه المخاوف تُسيطر عليكي
9- الخيانة
صفة واضحة وصريحة، والراجل الخاين ماينفعش تكملي معاه أبدا. لأنك لما بتعدي وتفوتي مرة واتنين وتلاتة بتتحول لعادة خلاص، وممكن بعدها تقبلي بحاجات مُرغمة عليها. ماينفعش ترتبطي براجل خاين حتى لو برر خيانته.
10- مابيقدرش أي حاجة بتعمليها
عدم التقدير في أي علاقة كفيل ينهيها فورا. ماتقبليش تكملي مع حد مش بيقدر مجهودك ولا تعبك. التقدير مش لازم يكون حاجة كبيرة، لكن بيظهر في مواقف مُعينة. يمكن حتى مايكونش بالكلام لكن في رجال ممكن يقدروا بالأفعال بأنه يبذل مجهود هو كمان عشان علاقتكم تبقى أحسن تقديرا للمجهود اللي بتعمليه.
دي أكيد مش كل الصفات السيئة في غيرها كتير، لكن في العموم العلاقة العاطفية بشريك الحياة لازم تكون مُريحة وبتسعدنا وغير كده بتبقى علاقة غير صحية وماينفعش نكمل فيها...
اقرئي أيضا: ما هو الحب وما هى درجاته وعوامل استمراره
الكاتب
دينا خليل
الإثنين ٢٧ يناير ٢٠٢٠
التعليقات
لا يوجد تعليقات
اترك تعليقا