دليل كامل: ورش عمل النسخة الرابعة من ايفنت E7kky to Empower

لحاملي تذاكر النسخة الرابعة من ايفنت E7kky to Empower اللي هتكون في الحرم اليوناني (الجريك كامبس) وسط البد - يوم الجمعة ١ مارس ٢٠٢٤، الدليل ده هيعرفكم ورش العمل المختلفة اللي هتكون في الايفنت، وكمان الجلسات الاستشارية الفردية والجماعية، واللي تقدروا تحضروا منها حسب نوع التذكرة. 

E7kky to Empower هو ميجا ايفنت بيستضيف أهم المتخصصين وصناع المحتوى والمؤثرين والشخصيات العامة بهدف تمكين النساء ورفع الوعي بقضايا المرأة ومشاركة التجارب والقصص الملهمة.. وهيكون شعار النسخة الرابعة من الايفنت (Speak, Inspire, Empower) "اتكلمي، الهمي، ومكّني.." علشان يعبر عن كل فعاليات الايفنت، من النقاشات والحكايات وورش العمل والبازار وحتى الألعاب والأنشطة الترفيهية.

ورش عمل النسخة الرابعة من E7kky to Empower

في الدليل ده هتعرفوا شركائنا وورش العمل اللي هيقدموها - كل ورشة مدتها 60 دقيقة كاملة.

1- EYouth

EYouth منصة التعليم الرائدة في الشرق الأوسط وشمال إفريقيا، وهدفهم تمكين الشباب العربي من خلال الكورسات التفاعلية الأونلاين، وهيكونوا مشاركين في E7kky to Empower بورش عمل عن:

1. مهارات أساسية للنجاح في الكارير

هدف الورشة التركيز على المهارات الأساسية اللي لازم تكون عندنا علشان نحقق نجاح حقيقي في الكارير المهني، زي مهارات التواصل والتفكير الإبداعي وإدارة الوقت وغيرها. 

 2. مهارات الوقوف على المسرح والتحدث أمام الجمهور

ورشة لكل المهتمين بالـPublic Speaking وعايزين يكونوا واثقين ومقنعين وهما بيتكلموا قدام جمهور، سواء كان الجمهور ده في Presentation للمدرسة والجامعة والشغل، أو Pitch للعملاء والمستثمرين، أو حتى مسرح وجمهور كبير.

3. طرق لتنمية البيزنس والتوسع في الأعمال

إيه هي أهم استراتيجيات تطوير الأعمال Business Development وزيادة الربحية؟، وهنعرف أكتر عن التسويق الإلكتروني وأهم النصايح اللي لازم نعرفها علشان ندير البيزنس ونتوسع.

4. أحدث أساليب التسويق أونلاين والتريندات

هنعرف أكتر عن أهم أساليب التسويق الإلكتروني وأحدثها، وإزاي نستغل التريند صح من غير ما يضرنا، وهنتعلم أكتر عن استراتيجيات التسويق على السوشيال ميديا وإزاي ندير الـCampaigns ونطلع أحسن النتايج.

2-Cairo Confessions

Cairo Confessions هي أول منصة للمشاركة وتبادل التجارب والاعترافات من مجتمع مجهول، وهيكونوا مشاركين في E7kky to Empower بورشة عمل:

5. التعامل مع الضغوط المالية

قعدة وتبادل خبرات عملية وتجارب حقيقية عن إزاي نتعامل مع الضغوط المالية الحالية، وإزاي ممكن نحقق الاستقرار المالي.

3-Batcave Studio

Batcave هو ستوديو احترافي لإنتاج الموسيقى وتسجيل وتصميم الصوت، تحت إدارة الموسيقي ومهندس الصوت أحمد نادر، وهيكونوا مشاركين في E7kky to Empower بورشة عمل:

6. أساسيات التعليق الصوتي

ورشة هنتعلم فيها أساسيات التعليق الصوتي اللي هتساعدنا ندخل مجالات كتير، بداية من التعليق على الفيديوهات كصناع محتوى، لغاية الإعلانات والكتب الصوتية والدوبلاج وحتى التمثيل الإذاعي وأصوات الألعاب.

4-Jobzella

Jobzella منصة التوظيف الأولى في الشرق الأوسط، بتقدم خدماتها لكل اللي بيدوروا على شغل وكارير أفضل وكمان بتساعد الشركات، وهيكونوا مشاركين في E7kky to Empower بورش عمل:

7. إزاي نلاقي فرص شغل مناسبة

ورشة هدفها التركيز على المهارات والاستراتيجيات اللي محتاجينها علشان نلاقي فرص عمل مناسبة، ومن خلالها هنعرف أكتر عن خطوات البحث وإزاي الـCV تعدي من بين متقدمين كتير.

8. مفاتيح كتابة أبلكيشن شغل ناجح

أهم النصايح والإرشادات اللي محتاجينها علشان نجاوب على أسئلة الأبلكيشن لأي وظيفة، وإيه أفضل الصياغات اللي تبرز مهاراتنا وتلفت نظر الـHRs.

9. مهارات مقابلات العمل وإزاي نتفاوض على المرتب

لو لقينا فرص العمل المناسبة وقدمنا الـCV وكتبنا الأبلكيشن صح وجه دورنا في الانترفيو.. نعمل إيه؟ ده اللي هتركز عليه الورشة علشان نعرف نقول إيه وما نقولش إيه في الانترفيو، وإزاي نركز على نقاط قوتنا، وإزاي ونتفاوض على المرتب من غير كسوف.

5-Y-Peer Egypt

Y-Peer منظمة بتشتغل في الصحة الإنجابية في 52 دولة حول العالم، تم إطلاقها من صندوق الأمم المتحدة للسكان سنة 2002، وابتدى في مصر سنة 2005، وهيكونوا مشاركين في E7kky to Empower بورشة عمل:

10. العنف القائم على النوع: إزاي نكسر الدايرة؟

ورشة عن العنف القائم على النوع وإزاي نتصدى له، والمشاركات والمشاركين هيتعرفوا على آليات مواجهة العنف وطرق الدعم والمساعدة.

11. محاربة الصور النمطية للنوع بالمسرح التفاعلي

ورشة هتستخدم تقنيات وأدوات مسرحية لفهم وتفكيك الصور النمطية للنوع الاجتماعي ومحاربتها. 

6-Shezlong

شيزلونج أول وأكبر منصة عربية للعلاج والدعم النفسي أونلاين، وهيكونوا مشاركين في E7kky to Empower بورش عمل:

12. التربية وتجنب التفرقة حسب النوع

هنعرف أهمية التربية القايمة على المساواة، وإزاي تجنب التفرقة بين الأطفال بناءً على الجنس والنوع، وهنتعلم إزاي نعزز قيم المساواة والتقبل في الأسرة.

13. طرق التعامل مع القلق الاجتماعي

نصايح واستراتيجيات وتقنيات فعّالة علشان نتعامل مع القلق الاجتماعي ونفهم أسبابه وليه بيحصل، ونحسن صحتنا النفسية وعلاقاتنا الاجتماعية.

14. إدراك علامات الخطر وفهم الريد فلاجز

كلنا بنتكلم عن الريد فلاجز، بس هل عارفين فعلًا إيه هي؟ الورشة دي هتساعدنا نفهم أكتر من خلال شرح علامات الخطر في العلاقات وإزاي نتصرف قصادها؟

15. أهمية الموافقة والتراضي ورسم الحدود الشخصية

إزاي نخلق وعي بأهمية الموافقة والتراضي في العلاقات بكل أنواعها، وإزاي نرسم حدود شخصية ونطبقها بشكل فعّال وبكل وضوح؟

7-Shamseya

شمسية هي مؤسسة اجتماعية هدفها تقديم حلول لتحديات الرعاية الصحية في مصر والشرق الأوسط، وهيكونوا مشاركين في E7kky to Empower بورش عمل:

16. قربي من جسمك وافهمي تغيراته

ورشة عمل هدفها تعزيز الوعي الذاتي وفهم الجسم وتغيراته، خصوصًا في فترة البلوغ ولحد سن الأمان بالنسبة للستات، والهدف الأساسي هو الشعور بالراحة في أجسامنا.

17. عن الحدود الجسدية

إيه هو مفهوم الحدود الجسدية وإزاي ندافع عنها؟ وهيتم التركيز على كيفية تطبيق الحدود الجسدية في العلاقات الشخصية.

8-Elharefa

الحريفة منصة للعمل الحر بتضم 50000 فريلانسر من ٧ دول مختلفة منها مصر والسعودية والإمارات وألمانيا، وهيكونوا مشاركين في E7kky to Empower بورش عمل:

18. إدارة تعليقات ورسائل السوشيال ميديا

أهم النصائح والاستراتيجيات الفعّالة لإدارة التعليقات والرسايل على السوشيال ميديا، والـ Dos & Don'ts علشان نحافظ على شكل البراند ونعزز تواجدها ومجتمعها.

19. مدير/ة نفسك: عالم العمل الحر

إيه هي فرص العمل الحر المتاحة؟ وإزاي نطور مهارات القيادة الذاتية؟ وأهم النصائح اللي محتاجينها علشان نبني كارير مستقل ناجح.

9-The Copywriter

ذا كوبي رايتر منصة تعليمية وترفيهية للكتابة الإبداعية وصناعة المحتوى بكل أشكاله، وهيكونوا مشاركين في E7kky to Empower بورش عمل:

20. مفاتيح وأساسيات صناعة المحتوى

لكل اللي عايزين يبتدوا صناعة محتوى ومش عارفين الطريق واللي ابتدوا وعايزين يحسنوا النتايج، الورشة دي هتركز على أساسيات صناعة محتوى جذاب يخطف العين ويحقق النتايج.

21. قواعد كتابة فيديو سكريبت ناجح

أساسيات كتابة سكريبت لفيديوز تيك توك وReels انستجرام، وإزاي نبدأ بـHook يخطف المتابعين ويكملوا الفيديو.

10-IEEE

IEEE هي جمعية غير ربحية للمهندسين/ات والمهنيين/ات في مجالات التكنولوجيا، اتأسست سنة 1963 وبتضم أكتر من 450.000 عضو/ة في 160 دولة، وهيكونوا مشاركين في E7kky to Empower بورشة عمل:

22. إتقان فن الراحة وأهميته

ليه مهم نرتاح؟ وهل الراحة والاسترخاء لهم طريقة علشان نحقق منهم نتايج أفضل؟ وكمان هنعرف أكتر عن دور الراحة في تحقيق التوازن الشخصي والنجاح المهني.

11-Taqseem Institute 

تقسيم هو أول معهد للفنون الأدائية والتراثية في مصر، أسسته الراقصة والفنانة إيمي سلطان، وهيكونوا مشاركين في E7kky to Empower بورشة عمل:

23. أساسيات الرقص الشرقي

هنتعلم أساسيات الرقص الشرقي على إيد متخصصات تقسيم، وهنحس بأهمية الرقص في تواصلنا مع جسمنا وتحسين شعورنا الداخلي.

صناع محتوى ومتخصصين مستقلين

ورش عمل هيقدمها صناع محتوى ومتخصصين ومحترفين - مدة كل ورشة 60 دقيقة.

24. إزاي تكون الـTiktoks والـReels لعبتكم - دينا حشيش

دينا حشيش هي مديرة المحتوى في منصة Rahet Bally، وصانعة محتوى كرييتف وعندها خبرة مع منصات إعلامية كبيرة وعلشان كده هتدينا خلاصة خبرتها في ورش عمل عن إزاي نـmaster الريلز والتيك توك.

25. خلق عادات أكل صحية - د. محمد راضي

أخصائي التغذية د. محمد راضي هيشاركنا بورشة عمل هدفها نعرف إزاي نحول الدايت من "خطة تعذيب" لأسلوب حياة؟.

26. بناء الثقة في النفس - نورهان ماهر

نورهان ماهر لايف كوتش متخصصة في علم النفس الايجابي هتشاركنا بورشة عمل علشان نتعلم إزاي نبني ثقتنا في نفسنا ونكون مؤمنين بيها.

27. صورة الجسم والثقة بالنفس - د. يسرا عزقول

د. يسرا عزقول صيدلانية وأخصائية تغذية هتساعدنا نبني صورة إيجابية لجسمنا من خلال أسلوب حياة متوازن بعيد عن الشعور بالذنب المرتبط بالأكل.

28. التشكيل بالصلصال لإدارة القلق والتوتر - شروق رأفت

شروق رأفت معالجة بالفن هتشاركنا بورشة عمل هنشتغل فيها بإيدينا وهتساعدنا نفرغ طاقتنا ونتعامل مع القلق والتوتر من خلال تشكيل الصلصال.

29. أساسيات التصوير بالموبايل - سارة زكريا 

سارة زكريا مصورة فوتوغرافية متخصصة في القصص الصحفية وتصوير المنتجات والأكل، وهتشاركنا بورشة عمل عن أساسيات التصوير بالموبايل وإزاي نطلع صور احترافية بسهولة. 

الجلسات الاستشارية الفردية - Coaching 1-1

أما الجلسات الاستشارية الفردية مع شركائنا هتكون مدتها من ١٥ لـ٢٠ دقيقة، ودي أهم الموضوعات:

1. دعم الناجيات من العنف القائم على النوع: تقديم المشورة القانونية والدعم النفسي والعاطفي وتوجيههم للموارد والأماكن والخدمات المتاحة.
2. سؤال وجواب عن العلاقات: فرصة للمشاركات علشان يطرحوا أسئلتهم عن العلاقات لمتخصصين ومتخصصات من شيزلونج.
3. أكتر من مجرد دايت - أسلوب حياة: مفهوم الحياة الصحية بشكل أشمل، ونصايح عن التغذية السليمة المتوازنة لكل شخص حسب طبيعة الجسم ونمط الحياة.
4. إزاي نخلق كارير أفضل: مساعدة المشاركات والمشاركين في التطور الوظيفي وفهم التحديات اللي بتواجههم وإزاي يتغلبوا عليها؟

الجلسات الاستشارية الجماعية

الجلسات الاستشارية الجماعية مع شركائنا هتكون مدتها من ٢٠ دقيقة، ودي أهم الموضوعات:

1. أساسيات بدء شركة ناشئة: معلومات ونصائح عن إزاي نبدأ شركة ناشئة ومحتاجين إيه علشان ننجح في سوق تنافسي؟
2. حميمية أفضل: الجواز والثقافة الجنسية: جلسة خاصة هنتكلم فيها مع متخصصين عن الثقافة الجنسية وإزاي نفهم جسمنا واحتياجاته.
3. لو طالب/ة ينفع اشتغل إيه؟: استشارات وفرص للوظايف المتاحة للطلاب، وإزاي يقدموا ويتقبلوا بدون خبرة عملية.
4. خدمات الصحة الإنجابية والجنسية: تثقيف عن الصحة الجنسية والوقاية من الأمراض، وأهم الأماكن التي بتقدم الخدمات دي.
5. إزاي نحقق التوازن بين الفاست فود وصحتنا: التوازن اللي كلنا بنحلم بيه، بين اللايف ستايل الصحي والاستمتاع بالأكل.

لحضور ورش العمل والجلسات الإرشادية والاستشارية العامة والخاصة والاستفادة بكل أنشطة الايفنت، اختاروا ما بين ٤ أنواع من التذاكر المتاحة على موقع تذكرتي (اللينك من هنا) - ولكل تذكرة مزايا مختلفة وعدد ورش واستشارات هتعرفوها من على تذكرتي. ولحضور الايفنت مجانًا بكل النقاشات والفعاليات الموجودة على المسرح وفي المساحة المفتوحة والبازار، احجزوا الـFree Entry من موقع eventix (اللينك من هنا) - التذكرة المجانية غير شاملة أي ورش عمل أو جلسات إرشادية من أي نوع. مستنينكم.