5 أسباب بتقولك ”ارقصي”

الرقص نشاط إنساني تعبيري، بيحصل استجابة لانفعالات المشاعر، خصوصًا لما تحركه حاجة الموسيقي.. والشعوب مارست الرقص من فجر التاريخ، وابتكروا رقصات في الفرح وفي الحزن، للصلاة وللعزا وللتعبير عن الحب، الرقص له 5 فوائد على اختلاف أنواعه من الفلامنكو والتانجو، للبلدي والزومبا.. اعرفي الفوائد:

1- بيحسن المزاج:
مع الضغوط اليومية والروتين، حياتنا بتكون أصعب.. جربي الرقص علشان تفكي الصعوبة دي، الدراسات العلمية قالت إنه بيحارب التوتر والقلق وبيرفع من هرمونات السيروتونين "هرمون السعادة" والدوبامين "مسئول عن الشعور بالمتعة". والرقص مع الأصحاب، حتى لو كان التنطيط في الحفلات، بيعتبر نشاط اجتماعي بيقدر يخلص الناس من الطاقة السلبية وبيواجه العزلة الاجتماعية اللي هي من أهم علامات الاكتئاب.

2- للحفاظ على الوزن أو فقدانه:
الرقص رياضة، ورياضة مفيدة جدًا لأنه بيحرك كل عضلات الجسم، مش بيشتغل على جزء معين بس. ولو اتبعتي نظام يومي من الرقص لمدة 30 دقيقة كل يوم مع الحفاظ على الأكل الصحي، هتلاقي وزنك قل وصحتك اتحسنت، وطبعًا مزاجك أروق زي ما قولنا.. ولو اخترتي الرقص الشرقي فهو هيبقى زي جلسة نحت للخصر.

3-بيقوي الذاكرة:
الرقص بينشط الذاكرة وبيقاوم الخرف، وده لأنه بيتم على نغمات موسيقية لازم الإنسان يعرفها علشان يجاريها في حركاته، فعلشان كده بينشط العقل بشكل أكبر، وفي دراسة اتعملت في إنجلترا على عدد من الكبار في السن، لاقت إنهم افتكروا مواقف معينة لما رقصوا على أغاني يعرفوها. 

4- بيعلم الصبر:
في الحقيقة الصيد هو اللي بيعلم الصبر، لكن كمان إتقان أنواع معينة من الرقص بتحتاج وقت ومجهود، زي رقص الباليه مثلًا، بس الفرق إنه مجهود ممتع في أغلب الأوقات. وحتى الرقص الشرقي، للي مابيعرفوش يرقصوا، بيبقى محتاج وقت ومجهود علشان العضلات تلين ويبقى في اندماج مع الإيقاع.. الرقص بيزود مرونة الجسم وبيزود قدرة العضلات على التحمل. 

5- طارد للسموم ومفيد للقلب والمناعة:
الرقص بيساعد في طرد السموم لأنه بينشط الدورة الدموية، وكمان بيخلي الجسم ينتج عرق أكتر، ويحتاج لشرب كميات أكبر من السوائل.. وهو مفيد للقلب والشرايين لأنه بيحرق الدهون اللي بتسبب أمراض كتير زي انسداد الشرايين والجلطات.. أما المناعة فبتزيد بسبب ارتبطها بالمزاج الجيد.. فـ "سيبي روحك وارقصي".