6 نصائح هتساعدك ماتتخنيش في الشتا

الشتا هو الفصل اللي بندخله بوزن ومقاسات هدوم، ونخرج منه والحاجات دي مضروبة في اتنين أو تلاتة، بسبب كميات الأكل اللي بنستهلكها، وده لأنه مع البرد بتزيد حاجتنا للأكل علشان الطاقة والدفا، وخصوصًا المشروبات الشتوية زي الهوت شوكليت والسحلب، والحاجة للسكر بتزيد.. ده جنب إن 10% من البشر بيتعرضوا للاكتئاب الموسمي اللي بيحصل مع تقلب الفصول وبعضهم بيلجأ للأكل لتعويض الحاجة النفسية وبالتالي زيادة الوزن في النهاية.. دي نصايحنا علشان تحافظي على وزنك –قدر الإمكان- في الشتا.. جربيها.

1-الوجبات الخفيفة

في الشتا بنحتاج ناكل كتير علشان نحصل على طاقة ونحس بالدفا، فبنزود في الوجبات الخفيفة ما بين الأكل، وده مش السبب الحقيقي ورا زيادة الوزن، لأن المشكلة هي بناكل إيه وإزاي.
فبدل أكل البطاطس المقلية جربي المسلوقة أو المشوية، والشوكولاتة استبدليها بالفاكهة الشتوية زي البرتقال، أو الموز مع رشة من الكاكاو الخام، أو اختاري الشوكولاتة الغامقة أكتر من 70% كاكاو.
الهوت شوكليت ممكن يبقى بكاكاو خام من غير سكر ولبن خالي الدسم، وحمص الشام وجبة خفيف صحية والشطة اللي فيه بتساعد على الدفء وبتعلي الحرق كمان.
كمان لو كنتي في الشارع واحتارتي تاكلي إيه بلاش الحاجات اللي فيها سكريات عالية، واختاري الذرة المشوي مثلًا، أو بطاطا مشوية بس من غير أي إضافات.
الوجبات الخفيفة

اقرئي أيضًا: حيل لمواجهة برودة الشتاء في المنزل

2-البدائل الصحية في الطبخ

قللي الزيوت والسمنة في الطبخ، واختاري الشوي والسلق بدل القلي، وركزي على أطباق الشوربة زي العدس وشوربة البطاطس وطواجن الخضار المشبعة، وابتعدي تمامًا عن الأكل السريع لأنه مليان بالسعرات الحرارية وبيخليكي تحسي بالجوع أسرع.. طريقة الطبخ حاجة بسيطة جدًا بس بتقلل عدد السعرات الحرارية في الأكل بشكل كبير.
ومهم تعرفي إن استخدام التوابل في الأكل بيزود من الشعور بالدفء وبيعلي حرق السعرات الحرارية.. واعتمدي على البقوليات والقمح الكامل لأنها مكونات بتساعد على الشبع لفترات أطول بكتير.

اقرئي أيضًا: طريقة عمل الشوربة بأكثر من وصفة لتستمتعوا بشتاء دافئ

3-تقليل السكر

أهم اختيار هيفرق في وزنك في الشتا، هو كميات السكر اللي بتستخدميها، تقليل السكر أو الامتناع عنه واستعمال العسل بحدود قليلة هيساعدك ماتكتسبيش وزن زايد بسرعة.
واستمدي السكريات من الفاكهة الطبيعية، ولو مش هتقدري تمنعي السكريات تمامًا يبقى حددي لنفسك معلقتين طول اليوم تقسميهم على المشروبات.
طريقة الطهي

4-التمارين البسيطة

ممارسة الرياضة شيء لابد منه، لكن لو مابتمارسيش رياضة جربي المشي الخفيف للسوبر ماركت بدل المواصلات، واستخدمي السلم في الشغل والبيت والمترو، وكمان شغل البيت، هيدفيكي ويحافظ على وزنك، وممكن تتمشي شوية وأنتي رايحة الشغل أو وأنتي راجعة.. ضيفي تمارين بسيطة لروتينك اليومي علشان تزودي من معدل الحرق.
كمان ممكن تمارسي الزومبا لأنها رقصة ممتعة بتدفي وبتساعدك في حرق الدهون وبتخلصك من المشاعر السلبية وهي مضاد اكتئاب طبيعي.

اقرئي أيضًا: تمارين رياضية صباحية تمنحك النشاط طوال اليوم

5-شرب الماء والنوم

النوم الجيد بيعلي الحرق في الجسم، لازم تنامي من 6-8 ساعات يوميًا.. وبما إن شرب المايه أقل في الشتا فاستبدليها بالشوربة والمشروبات العشبية بدون سكر، القرفة مثلا بتحافظ على مستوى السكر في الدم، والشاي الأخضر فيه مضادات أكسدة قوية، والمشروبات دي بشكل عام بتدفي الجسم.. نصيحة مهمة كمان، ماتكليش قدام التلفزيون أو اللابتوب علشان هتاكل أكتر من المعتاد.

6-امضغي الأكل كويس

في دراسات كتير اتعملت على علاقة مضغ الأكل بشكل جيد، والكميات اللي بيتم تناولها، ولقت إن المضغ المتأني بيخلي الشخص ياكل كميات أقل ويشبع أسرع، علشان المخ بيتنبه إنه قضى وقت طويل في الأكل وبالتالي بيبعت إشارات أسرع للشبع.. كمان مهم إنك تقسمي وجباتك في أطباق صغيرة.

النوم الجيد