اتيكيت.. اتكلمي لغة ”الشوكة والسكينة” في العزومات

أفضل أماكن هي الأماكن اللي بنكون على راحتنا فيها، لكن في أوقات بيكون مطلوب مننا نمشي على اتيكيت المكان، خصوصًا في العزومات الرسمية الخاصة بالعمل.. علشان كده قررنا نعمل حلقات عن الاتيكيت حسب الأكلات والأماكن، في الحلقة دي هنعرف اتيكيت الشوكة والسكينة أو اللغة اللي بتتكلمها الشوك والسكاكين..

1- استراحة

لما تحبي توقفي الأكل، أو تاخدي استراحة لأي سبب خلي الشوكة والسكينة على أطراف الطبق بشكل مايل، علشان الطبق مايتشالش من قدامك وإنتي ماخلصتيش.

2-جاهز لطبق تاني

لما تخلصي وجبة زي المقبلات وتكون جاهزة للطبق الرئيسي مثلا، خلي الشوكة في تقاطع مع السكينة.

3- الأكل عجبك

علشان تعبري إن الوجبة عجبتك، خلي الشوكة والسكينة جنب بعض بعرض الطبق، هتدي معنى إنه الأكل ممتاز.

4- ماحبتيش الأكل

لما الوجبة تكون سيئة، أو الخدمة في المطعم ماتعجبكيش، خلى السكينة جوا أسنان الشوكة، فهتقول إنك ماحبتيش الأكل.

5- خلصتي أكل

لما تحبي تقولي إنك خلصتي أكل تمامًا، خلي الشوكة والسكينة جنب بعض بطول الطبق.