”دسوقي & صودا”.. مطعم للأكيلة وعشاق الجبنة السايحة

كلنا بنقع في حيرة اختيار المطاعم وبنبقى محتاجين حد يقترحلنا مكان ويقولنا مميزاته وعيوبه، علشان كده قررنا نجرب أماكن ونحكيلكم عنها ونقييمها.. بس لازم تفتكروا إن الحياة تجارب والأكل أذواق، ودي تجربتنا وذوقنا..

هنبتدي بمطعم "دسوقي أند صودا" اللي شعاره "أكل شارع.. شرب أفرنجي"، وده لأنه بيجمع بين قايمة أكل زي الحواوشي والسجق والفطير والفول والطعمية وغيرها من الأكلات المنتشرة في كل مكان في مصر، مع مشروبات وكوكتيلات عصاير غربية  زي البيناكولادا والبيتش كيس.. والمحل اسمه "دسوقي" على اسم صاحبه.
 إحنا روحنا فرعهم في الدقي، ساعات ممكن يكون المكان زحمة، وتستنوا شوية خصوصًا في نهاية الأسبوع، وأيام تانية بيكونوا رايقين.. المكان حلو والديكور والإضاءة هايلين، والمزيكا مش عالية فمش بتضايق وغالبًا بتكون أغاني أندرجراوند والمنيو لوحدها تفتح النفس.

ندخل في الجد بقى.. إحنا طلبنا سجق جبنة سايحة، ومكرونة فراخ كرسبي، وفراخ جبنة سايحة، وبطاطس بالتوم، وسلطة خضرا.. الطلب ماتأخرش وكان سخن بس الفراخ جت سبايسي.. الأكل غرقان في الجبنة بشكل حرفي وواخد وش في الفرن مخلي شكله يجنن، والفراخ والسجق كتير، مش بيعرضوا عينات في الطبق اللي هو نفسه حجمه كبير أصلا.. لكن المشكلة إن بعد كام معلقة بتلاقي نفسك مش هتقدر تكمل الطبق بسبب حجمه وكم المكونات اللي فيه، وكأنك مش قادر تتنفس من الغرق في الجبنة وده شيء سعيد. السجق كان حلو والتوابل مظبوطة، والفراخ في المكرونة كانت مقرمشة.. اللي معجبناش بس البطاطس محسناش فيها بطعم للتوم وطلعت بتتقدم باردة.. وللأسف مقدرناش نجرب المشروبات لأننا اكتفينا من الأكل.

الخلاصة:

- أسعارهم متوسطة.. مش غالية ومش قليلة وعندهم 12% خدمة بتضاف للفاتورة مع ضربية القيمة المضافة.
- نصيحتنا إنكم تتشاركوا في الطلبات وماتتطلبوش كتير، ولو حبيتوا زودوا.. طلب واحد يكفي فردين "لو مش أكيلة للآخر".
- الخدمة لطيفة.. والناس اللي شغالين هناك ودودين.
- العيب.. الانتظار وقت الزحمة بيطول شوية.
- عندهم فرعين.. المعادي في 14 شارع 9 "قريب لمترو ثكنات المعادي".. والدقي 34 شارع مشيل باخوم متفرع من شارع مصدق.
- قيمنا المطعم بـ 4/5.
-شوفوا المنيو والأسعار من هنا..