”بلاي ليست” المحتارين.. عمرو دياب على رأسهم

أغاني بنحبها لكن كلماتها مُحيرة أو محتارة، يا إما الشاعر ماكنش عارف يعمل إيه فكمل بأي كلام، أو كانت مشاعره الحقيقية متلخبطة فظهرت حيرته وتردده وساعات استفهامه في كلمات الأغنية.. جمعنالكم قائمة أغاني للمحتارين..

- أنا عايش ومش عايش – عمرو دياب

الهضبة موجود وبقوة في القائمة دي، وأنا عايش ومش عايش مش محتاجة شرح لكم الحيرة اللي كان فيها عمرو دياب  لدرجة أنه مش عارف إذا كان عايش ولا لأ، وبينهي الأغنية بعلامة استفهام "ليالينا اللي كانوا مابينا زمان راجعين ولا راحوا؟".

- يا ترى – بهاء سلطان

من أهم أغاني بهاء سلطان وحيرته فيها فاقت الحدود، لدرجة إنه ماكنش عارف يحدد "قريب ولا بعيد حزين ولا سعيد".. أغنية استفهامية محيرة بتكمل بـ" أبعد وأنساك.. ولا أستناك".. والكورس تعب من الحيرة من كتر ما قالوا "ولاااا؟" ورا الأستاذ بهاء.

-اشتكي منه – نانسي عجرم

الأغنية دي بتقول: "أشتكي منه؟ طب أبعد عنه؟.. لا كاني ولا ماني ما خلصت أنا".. والمشكلة بتكمل: "عايز يرجعلي تاني!.. عايز من قلبي إيه؟".. الأفضل تسمعوا المشكلة من نانسي نفسها.

- سيرة الحب – أم كلثوم

كوكب الشرق كمان كان لها علامات، فمثلا وهي بتقول "ياللي ظلمتوا الحب وقلتوا وعيدتوا عليه، وقولتوا عليه مش عارف إيه!"، غالبًا الشاعر معرفش يحدد قالوا إيه بالظبط فكتب إنه مش عارف حرفيًا.. والأغنية بتكمل: "العيب فيكم، يا فـ حبايبكم" وحددوا أنتوا بقى.

-أحبك أكرهك – عمرو دياب

الحيرة الخالدة لعمرو دياب، ماكنتش عارف يحدد يحبها ولا يكرهها، يسيبها ولا يندهها، لدرجة إنه طرح حيرته بشكل واضح: "أعلق نفسي بيكي ولا أعمل فيكي إيه؟"، كان المفروض يكمل الأغنية بإفيه "سودتوا عيشتنا".

- جرح تاني – شيرين

الأغنية دي ماكنش فيها حيرة قد ما الشاعر اتلخبط وكتب أي حاجة على الوزن وخلاص، بتقول: "من النهارده مفيش أحزان، مفيش ألوان".. معرفش إزاي هيبقى مفيش أحزان وألوان مع بعض، الست اتعقدت وهتقف في الأوفسايد.. وشيرين بقت تغنيها في الحفلات من غير الجزء ده أصلا.

- الهوى غلاب – أم كلثوم

بتطرح الست سؤال مهم في البداية وبتقول: "هو صحيح الهوى غلاب؟"، وبعدين تكمل "معرفش أنا!" وتسيبنا إحنا قدام السؤال كده وتختم بـ: "إزاي يا ترى، أهو ده اللي جرا، وأنا معرفشي" وتسيبنا وتمشي.

- حبيبي يا عمري – عمرو دياب

حيرة تانية لعمرو دياب ماكنش عارف فيها هو رايح فين، ورجع تاني.. الراجل من كتر ما هو محتار، راح مكان غلط.