أشهر كدبات الرجالة في المواقف المختلفة
الأكثر مشاهدة
العلاقة بين الراجل والست مابتمشيش من غير شوية بهارات، بتزيد أو بتقل على حسب الشخصية، بس فيه كلمات بقت معروفة ومتكررة في كل العلاقات، وبيستخدمها الرجالة دايمًا لدرجة إن جهاز كشف الكدب بيفرقع زي ما حصل مع محمد هنيدي في "وش إجرام".. والستات بتعدي بمزاجها.. دي المواقف والكدبات اللي حكتلنا البنات عنها:
أشهر كدبات الرجالة لما يحبوا يخلعوا
1-"أنتي تستاهلي حد أحسن مني"
دي بيقولها بعد ما يعدد عيوبه اللي اكتشفها زي اكتشاف الإنسان الأول للنار، وقرر إنه مايبهدلش بنات الناس معاه "اللي هو أنتي بس"، ويدور على بنات ناس تانين.
2-"ماما هتجوزني بنت خالتي/ أهلي هيجوزوني من البلد"
مامته في العناية المركزة راسها وألف سيف يا يتجوز بنت خالته يا تموت.
3-"مستقبلي مش واضح"
ولا هيوضح يا بابا.
اقرأي أيضا : أفلام أبطالها كانوا مرتبطين في الحقيقة
4-"أنتي فهمتي غلط"
ده بيطلعك مجنونة ومتوهمة وأنتي فهمتي الخروجات والفسح والمكالمات غلط.. حتى كلمة بحبك كانت مؤثرات صوتية.
5-"العيب فيا مش فيكي"
أشهر كدب للرجالة لما يطنشوكي
- 1-"التليفون كان قاطع شحن"
عايش في قبيلة مايعرفوش شواحن التليفونات لسه.
2-"كنت في ميتنج معرفتش أرد"
الاجتماع ده مابيخلصش 24 ساعة/7 أيام في الأسبوع. بيشتغل في مجلس إدارة العالم.
3-"الشبكة في البيت واقعة"
كانت شغالة كويس في أول العلاقة سبحان الله.
4-"عملت حادثة/ اتخنقت ورحت القسم/ صاحبي تعب"
كلها علامات إن ماتش البلاي ستشين طوّل شوية.
أشهر مبررات الخيانة عند الرجالة
1-"إحنا مش ملايكة وكلنا بنغلط.. ربنا بيسامح إنتي مش هتسامحي!"
إذاعة القرآن الكريم هتشتغل في الخلفية
- 2- "كنت بجاريها بس علشان أعرف آخرها إيه"
3-"مابقتش بتهتم بنفسها زي الأول"
بص لنفسك يا توم كروز زمانك.
:اقرأي أيضا
4-"أنا ومراتي متجوزين على الورق بس.. خلاص هنطلق"
هتكتشفي إن مراته حامل بعد شهرين.
الكدب في بداية العلاقة "الوسطي الكيوت"
1-"أنا عمري ما هكدب عليكي/ ماهسيبك/ماهخونك"
بتعرفي تعدي لحد كام؟!
2-"نجاحك هو نجاحي/ فلوسك ليكي أنتي"
جده طلعت حرب مؤسس بنك مصر.
3-"أنا راجل متفتح مش متخلف"
هو متفتح بس هاتي باسورد الفيسبوك برضه.
تعرفي علي علامات تخبرك أنها علاقة مؤذية
4-"مابحبش هيفاء وهبي.. كلها صناعي"
صقفة هنا.
اقرأي أيضا : إتيكيت الزيارة الأولى في زواج الصالونات
الكاتب
احكي
الأحد ١٠ ديسمبر ٢٠١٧
التعليقات
لا يوجد تعليقات
اترك تعليقا