إتيكيت الزيارة الأولى في زواج الصالونات

هدف الإتيكيت هو إن الناس تسيب انطباع كويس عنها، خصوصًا في التعارف الأول، وطبعًا الزيارة الأولى للعروسة  من أهم اللقاءات، ولها قواعد لازم الطرفين يتبعوها علشان يكون الانطباع عند الطرفين كويس.. وهي:

- العروسة

البساطة أهم حاجة.. اهتمي إن لبسك يكون بسيط وكلاسيك، بلوزة على بنطلون أو جيب، قماش أو جينز على حسب نمط لبسك العادي، ويفضل إن المكياج يكون بسيط وخفيف بيحدد ملامحك بس، وكمان تسريحة شعرك أو ألوان حجابك.

-بيت العروسة

حددوا المكان اللي هيقعدوا فيه بحيث مايكشفش باقي البيت أو يقيد حركة باقي الأسرة، رتبوا المكان ويفضل وضع فازة صغيرة مع قليل من المعطر للمكان.
الضيافة بتبدأ بالعصاير وبعدها شاي وكيك، ولو فيه فاكهة لازم يكون في أطباق وسكاكين للتقطيع، ومناديل ورق.
لو في أخوات للعروسة لازم يرحبوا بالعريس وأهله ويستأذنوا بعد وقت قصير ويمشوا.

-العريس

البساطة مرة تانية.. اعتمد على اللبس الكلاسيك بس مش بدلة وكرافت، البرفيوم والساعة مهمين بس بدون إدعاء، وافتكر إن نوع الشوكولاتة اللي هتدخل بيه هيفرق في تقييمك.
الحضور في المعاد مهم، مش بدري عن المعاد ولا متأخر، ولازم في الزيارة الأولى يكون معاك شخص من عيلتك، وماتقعدش رجل على رجل.

-الكلام

في أول مقابلة بيتم التعارف ما بينكم، مجال العمل والهوايات، بتتعرفوا على الحاجات المشتركة، لازم ما ترفعوش التكليف بينكم وبين بعض، وإن كان مطلوب إن العريس يعبر عن إعجابه باختيار العروسة لألوان لبسها مثلا، ده ممكن يفك الجليد بشياكة.
في المقابلة دي ما تتكلمش عن الأمور المادية وأسعار مشترياتك علشان هتبان شخصية مادية، الكلام في الأمور المادية والشقة والعفش مع والد العروسة أو اللي في مكانه، وافتكر إن الكذب والإدعاء مش شيء كويس عمومًا، اتكلم عن ظروفك الحقيقية مع أهل العروسة لأن كده كده هيتعرف.
قبل ما تمشي بتتفقوا على الرد في خلال عدد من الأيام، ولو في موافقة بتتم عزومة للعيلة على الغذاء أو العشاء علشان يتفقوا على باقي التفاصيل.