١٠ أنواع انسكيوريتي بتعيشها الستات بشكل مستمر
الأكثر مشاهدة
الـInsecurity أو انعدام الأمان، هو الشعور الدائم بالخوف من رد فعل الناس، وبيلازمه إحساس إننا تقال على اللي حوالينا، وبيخلينا نفكر في الكلام أكتر من مرة، ونتراجع عن اللي هنقوله بسبب الخوف – حتى لو في مواقف الحياة العادية، الشعور ده بيقيد مشاعرنا وأفكارنا طول الوقت وقبل النوم بيتحول لتفكير زايد أو Overthinking بيضيع كل محاولة للاسترخاء والراحة، واللي بيعاني من انعدام الأمان بيهتم بمشاعر اللي حواليه بشكل مبالغ فيه أحيانًا، وبيخاف يجرحهم بأي شكل ويخاف من ردود فعله تجاههم، وممكن ينعزل عنهم بسبب الخوف عليهم أو منهم.. إنسكيور يعني شخص واثق في نفسه، بس الثقة دي بتنهار بأقل تعليق من الناس، أو بفكرة صغيرة بتخطر على باله.
إحساس عدم الأمان
بس إحنا كستات –في الوطن العربي والعالم كله- عندنا مجموعة حاجات مشتركة بتخلينا نحس كتير بالإنسكيوريتي، وعدم الراحة والأمان وبنقلق بسببها وكتير مننا بيكون محتاج تدخل من متخصص نفسي علشان يحلها.. ومنها:
1-اللون
عدد كبير مننا بيكون إنسكيور بسبب لون البشرة، وده سببه الصورة النمطية المزيفة اللي بتقول الأبيض = أحلى، الجمال يعني بنت شقرا، العيون الزرقا هي الأنوثة.. كلها حاجات اتربينا عليها في اللاوعي، وكبرنا وهي جزء من ثقافتنا، وطول الوقت بتخلينا نجري ورا كريم لتفتيح البشرة أو فرد الشعر، رغم إننا عرب معظمنا عيونه بني وشعره أسود ولونه قمحي.
اقرئي أيضًا: خناقات يومية بين العقل والقلب محتاجين نحسمها
2-الوزن
واحد من أبرز وأوضح مشاعر انعدام الأمان عند ستات كتير، الوزن.. طول الوقت لازم نحاول نمشي على دايت، ونتكسف لما نلخبط في الأكل قدام الناس (أصل هيقولوا علينا إيه؟)، ونتكلم عن الرياضة والحياة الصحية علشان نبان ناس مهتمة بنفسها مش سايبين نفسنا كده وخلاص.. على طول إحنا في صراع للوصول للصورة المثالية اللي بنشوفها في التلفزيون والجرايد والإنترنت.
3-الشغل
القلق المتعلق بالشغل والمستقبل المهني، دايمًا بنفكر إننا صعب نشتغل في مكان كويس أو نحقق إنجاز في شغلنا لأننا أقل من إن ده يحصل وإزاي هننافس كل زمايلنا –خصوصًا لو المجال ذكوري-، واحدة من الأفكار اللي دايمًا بتحاصرني بشكل شخصي فكرة إني أكيد مابعرفش أعمل حاجة، وده حتى لو كل اللي حواليا بيقولوا العكس.
اقرئي أيضًا: أشياء بسيطة تجعلنا ممتنين لحياتنا وسعداء أيضًا
4-التميز في مجالك
مش بس فكرة الشغل في العموم بتسبب مشكلة انسكيوريتي عند الستات، لأ التميز في مجالها كمان بيفتح باب كبير من انعدام الأمان والتفكير الزايد، لأنك دكتورة أمراض نسا/مهندسة/فنانة/مخرجة فأكيد أنتي محتاجة تشتغلي أكتر طول الوقت علشان تثبتي إنك تستحقي الوظيفة وتتحملي نظرات الشك والتقليل وصوتك الداخلي اللي بيقولك ماكنش لازم تختاري التخصص ده.
5-الجواز
ضغط المجتمع على البنت إنها لازم تتجوز ويكون ده الغاية الأهم بالنسبالها، بيسبب شعور كبير بالانسكيوريتي، وبيخّرج منه أسئلة كتير وأفكار كلها بتقلل الثقة في النفس وتنعكس على الحياة.. وفجأة تلاقي نفسك بتكرهي الأفراح والمناسبات العائلية وتحافظي تظهري فيها، أو تبتدي تدوري على عيوبك وتحاولي تحليها بشكل مؤذي، وتحاوطي نفسك بكلام زي أنا أكيد مش جميلة وماتحبش وووو.
اقرئي أيضًا: أنشطة تقدر البنات تعملها لو الشوارع أمان
6-الأنوثة
رغم إن كل الستات يهمها مشاعر الطرف الآخر تكون أكبر من مجرد شهوة، لكن برضه بيفضل جزء منها خايف من فكرة فقدان التأثير الأنثوي لها على شريكها وبيحاول يتأكد بكل الطرق إنه موجود ومستمر، والشك في وجوده ولو بسيط بيدمر ستات كتير.
7-الفلوس
مع صعوبة الحياة والوضع الاقتصادي، فقى فيه جزء مننا بيعاني من قلق دائم متعلق بكم الفلوس اللي بيحققوها من شغلهم، وبيتطور الموضوع ويبقى بتعملي فلوس أكتر = أنتي شخص أفضل.
اقرئي أيضًا: عادات سيئة عليكِ التخلص منها كامرأة ناضجة
8-أفكارك وآراءك
أنتي ست؟.. يبقى لازم تفكري مرة وانتين وعشرة قبل ما تقولي رأيك في الدين، السياسة، الفيزياء والعلوم كلها، وكورة القدم.. أنتي دايمًا أقل من إنك تفهمي حاجات معقدة وعميقة وذكورية زي دي، ولازم تراجعي أفكارك وآرائك كتير قبل ما تشاركيها مع الناس.
9-الحب
الخوف والقلق الدائم من تغير مشاعر الطرف التاني تجاهك، واحدة من أبرز الحاجات اللي بتسبب انسكيوريتي للستات، خصوصًا مع التغيرات المزاجية الشهرية وحدة الطباع أحيانًا، أو مع التعرض لظروف نفسية صعبة، أو المرور بتغيرات جسمانية بسبب الحمل أو الإصابة بمشكلة صحية.
اقرئي أيضًا: المراحل السبع لتجاوز الانفصال العاطفي واستعادة طاقتك
10-العمر
كتير ستات بيحاولوا يبانوا أصغر من سنهم، بيعملوا كل اللي يقدروا عليه علشان التجعيدة دي ماتبنش، أو الترهل ده يختفي.. مهم إننا نبقى حلوين ونشوف نفسنا حلوين لكن ماتبقاش حياتنا كلها صراع دائم ضد السن، وخوف منه وبحث مكثف عن كل منتجات الـ .Anti-aging
أهم حاجة علشان تتغلبي على الشعور بعدم الأمان إنك تحبي نفسك زي ما هي، بعيوبها ومميزاتها، لأن هي اللي بتفرقك عن باقي البشر.. دايمًا دوري على نقاط القوة فيكي وماتستسلميش لأي فكرة تحسسك إنك أقل أو مش كفاية.
اقرئي أيضًا:
الكاتب
ندى بديوي
الأربعاء ٣١ يوليو ٢٠١٩
التعليقات
لا يوجد تعليقات
اترك تعليقا